Salmi 22

¹ Magistro chori. Ad modum cantici " Cerva diluculo ". Psalmus.David.

² Deus, Deus meus, quare me dereliquisti?
Longe a salute mea verba rugitus mei.

³ Deus meus, clamo per diem, et non exaudis,
et nocte, et non est requies mihi.

⁴ Tu autem sanctus es,
qui habitas in laudibus Israel.

⁵ In te speraverunt patres nostri,
speraverunt, et liberasti eos;

⁶ ad te clamaverunt et salvi facti sunt,
in te speraverunt et non sunt confusi.

⁷ Ego autem sum vermis et non homo,
opprobrium hominum et abiectio plebis.

⁸ Omnes videntes me deriserunt me;
torquentes labia moverunt caput:

⁹ “ Speravit in Domino: eripiat eum,
salvum faciat eum, quoniam vult eum ”.

¹⁰ Quoniam tu es qui extraxisti me de ventre,
spes mea ad ubera matris meae.

¹¹ In te proiectus sum ex utero,
de ventre matris meae Deus meus es tu.

¹² Ne longe fias a me,
quoniam tribulatio proxima est,
quoniam non est qui adiuvet.

¹³ Circumdederunt me vituli multi,
tauri Basan obsederunt me.

¹⁴ Aperuerunt super me os suum
sicut leo rapiens et rugiens.

¹⁵ Sicut aqua effusus sum,
et dissoluta sunt omnia ossa mea.
Factum est cor meum tamquam cera
liquescens in medio ventris mei.

¹⁶ Aruit tamquam testa palatum meum,
et lingua mea adhaesit faucibus meis,
et in pulverem mortis deduxisti me.

¹⁷ Quoniam circumdederunt me canes multi,
concilium malignantium obsedit me.
Foderunt manus meas et pedes meos,

¹⁸ et dinumeravi omnia ossa mea.
Ipsi vero consideraverunt et inspexerunt me;

¹⁹ diviserunt sibi vestimenta mea
et super vestem meam miserunt sortem.

²⁰ Tu autem, Domine, ne elongaveris;
fortitudo mea, ad adiuvandum me festina.

²¹ Erue a framea animam meam
et de manu canis unicam meam.

²² Salva me ex ore leonis
et a cornibus unicornium humilitatem meam.

²³ Narrabo nomen tuum fratribus meis,
in medio ecclesiae laudabo te.

²⁴ Qui timetis Dominum, laudate eum;
universum semen Iacob, glorificate eum.
Metuat eum omne semen Israel,

²⁵ quoniam non sprevit neque despexit afflictionem pauperis
nec avertit faciem suam ab eo
et, cum clamaret ad eum, exaudivit.

²⁶ Apud te laus mea in ecclesia magna; vota mea reddam in conspectu timentiumeum.

²⁷ Edent pauperes et saturabuntur;
et laudabunt Dominum, qui requirunt eum:
“ Vivant corda eorum in saeculum saeculi! ”.

²⁸ Reminiscentur et convertentur ad Dominum
universi fines terrae,
et adorabunt in conspectu eius
universae familiae gentium.

²⁹ Quoniam Domini est regnum,
et ipse dominabitur gentium.

³⁰ Ipsum solum adorabunt omnes, qui dormiunt in terra;
in conspectu eius procident omnes, qui descendunt in pulverem.
Anima autem mea illi vivet,

³¹ et semen meum serviet ipsi.
Narrabitur de Domino generationi venturae;

³² et annuntiabunt iustitiam eius
populo, qui nascetur: “ Haec fecit Dominus! ”.