Salmi 46

¹ Magistro chori. Filiorum Core. Secundum " Virgines... ".Canticum.

² Deus est nobis refugium et virtus,
adiutorium in tribulationibus inventus est nimis.

³ Propterea non timebimus, dum turbabitur terra,
et transferentur montes in cor maris.

⁴ Fremant et intumescant aquae eius, conturbentur montes in elatione eius.

⁵ Fluminis rivi laetificant civitatem Dei,
sancta tabernacula Altissimi.

⁶ Deus in medio eius, non commovebitur;
adiuvabit eam Deus mane diluculo.

⁷ Fremuerunt gentes, commota sunt regna;
dedit vocem suam, liquefacta est terra.

⁸ Dominus virtutum nobiscum,
refugium nobis Deus Iacob.

⁹ Venite et videte opera Domini,
quae posuit prodigia super terram.
Auferet bella usque ad finem terrae,

¹⁰ arcum conteret et confringet arma
et scuta comburet igne.

¹¹ Vacate et videte quoniam ego sum Deus:
exaltabor in gentibus et exaltabor in terra.

¹² Dominus virtutum nobiscum,
refugium nobis Deus Iacob.