Salmi 108

¹ Canticum. Psalmus. David.

² Paratum cor meum, Deus,
paratum cor meum,
cantabo et psallam. Euge, gloria mea!

³ Exsurge, psalterium et cithara,
excitabo auroram.

⁴ Confitebor tibi in populis, Domine,
et psallam tibi in nationibus,

⁵ quia magna est usque ad caelos misericordia tua,
et usque ad nubes veritas tua.

⁶ Exaltare super caelos, Deus,
et super omnem terram gloria tua.

⁷ Ut liberentur dilecti tui,
salvum fac dextera tua et exaudi me.

⁸ Deus locutus est in sancto suo:
“ Exsultabo et dividam Sichimam
et convallem Succoth dimetiar;

⁹ meus est Galaad, et meus est Manasses,
et Ephraim fortitudo capitis mei,
Iuda sceptrum meum.

¹⁰ Moab lebes lavacri mei;
super Idumaeam extendam calceamentum meum,
super Philistaeam vociferabor ”.

¹¹ Quis deducet me in civitatem munitam?
Quis deducet me usque in Idumaeam?.

¹² Nonne, Deus, qui reppulisti nos?
Et non exibis, Deus, in virtutibus nostris?

¹³ Da nobis auxilium de tribulatione,
quia vana salus hominis.

¹⁴ In Deo faciemus virtutem,
et ipse conculcabit inimicos nostros.