Psalmi 138

¹David.
Confitebor tibi, Domine, in toto corde meo,
quoniam audisti verba oris mei.
In conspectu angelorum psallam tibi,
²adorabo ad templum sanctum tuum;
et confitebor nomini tuo
propter misericordiam tuam et veritatem tuam,
quoniam magnificasti super omne nomen eloquium tuum.
³In quacumque die invocavero te, exaudi me;
multiplicabis in anima mea virtutem.
⁴Confitebuntur tibi, Domine, omnes reges terrae,
quia audierunt eloquia oris tui.
⁵Et cantabunt vias Domini,
quoniam magna est gloria Domini;
⁶quoniam excelsus Dominus et humilem respicit
et superbum a longe cognoscit.
⁷Si ambulavero in medio tribulationis, vivificabis me;
et contra iram inimicorum meorum extendes manum tuam,
et salvum me faciet dextera tua.
⁸Dominus perficiet pro me;
Domine, misericordia tua in saeculum:
opera manuum tuarum ne despicias.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati