Salmi 45

¹ Magistro chori. Secundum " Lilia... ". Filiorum Core.
Maskil. Canticum amoris.

² Eructavit cor meum verbum bonum,
dico ego opera mea regi.
Lingua mea calamus scribae velociter scribentis.

³ Speciosus forma es prae filiis hominum,
diffusa est gratia in labiis tuis,
propterea benedixit te Deus in aeternum.

⁴ Accingere gladio tuo super femur tuum, potentissime,
magnificentia tua et ornatu tuo.

⁵ Et ornatu tuo procede, currum ascende
propter veritatem et mansuetudinem et iustitiam.
Et doceat te mirabilia dextera tua:

⁶ sagittae tuae acutae
- populi sub te cadent -
in corda inimicorum regis.

⁷ Sedes tua, Deus, in saeculum saeculi;
sceptrum aequitatis sceptrum regni tui.

⁸ Dilexisti iustitiam et odisti iniquitatem,
propterea unxit te Deus, Deus tuus, oleo laetitiae prae consortibus tuis.

⁹ Myrrha et aloe et casia omnia vestimenta tua;
e domibus eburneis chordae delectant te.

¹⁰ Filiae regum in pretiosis tuis;
astitit regina a dextris tuis ornata auro ex Ophir. -

¹¹ Audi, filia, et vide et inclina aurem tuam
et obliviscere populum tuum et domum patris tui;

¹² et concupiscet rex speciem tuam.
Quoniam ipse est dominus tuus, et adora eum.

¹³ Filia Tyri cum muneribus;
vultum tuum deprecabuntur divites plebis.

¹⁴ Gloriosa nimis filia regis intrinsecus,
texturis aureis circumamicta.

¹⁵ In vestibus variegatis adducetur regi;
virgines post eam, proximae eius, afferuntur tibi.

¹⁶ Afferuntur in laetitia et exsultatione,
adducuntur in domum regis.

¹⁷ Pro patribus tuis erunt tibi filii;
constitues eos principes super omnem terram.

¹⁸ Memor ero nominis tui
in omni generatione et generatione;
propterea populi confitebuntur tibi in aeternum
et in saeculum saeculi.