Salmi 81

¹ Magistro chori. Secundum " Torcularia... ". Asaph.

² Exsultate Deo adiutori nostro;
iubilate Deo Iacob.

³ Sumite psalmum et date tympanum,
psalterium iucundum cum cithara.

⁴ Bucinate in neomenia tuba,
in die plenae lunae, in sollemnitate nostra.

⁵ Quia praeceptum in Israel est,
et iudicium Deo Iacob.

⁶ Testimonium in Ioseph posuit illud,
cum exiret de terra Aegypti;
sermonem, quem non noveram, audivi:

⁷ “ Diverti ab oneribus dorsum eius;
manus eius a cophino recesserunt.

⁸ In tribulatione invocasti me, et liberavi te,
exaudivi te in abscondito tempestatis,
probavi te apud aquam Meriba.

⁹ Audi, populus meus, et contestabor te;
Israel, utinam audias me!

¹⁰ Non erit in te deus alienus,
neque adorabis deum extraneum.

¹¹ Ego enim sum Dominus Deus tuus,
qui eduxi te de terra Aegypti;
dilata os tuum, et implebo illud.

¹² Et non audivit populus meus vocem meam,
et Israel non intendit mihi.

¹³ Et dimisi eos secundum duritiam cordis eorum,
ibunt in adinventionibus suis.

¹⁴ Si populus meus audisset me,
Israel si in viis meis ambulasset!

¹⁵ In brevi inimicos eorum humiliassem
et super tribulantes eos misissem manum meam.

¹⁶ Inimici Domini blandirentur ei,
et esset sors eorum in saecula;

¹⁷ et cibarem eos ex adipe frumenti
et de petra melle saturarem eos ”.