Salmi 41

¹ Magistro chori. Psalmus. David.

² Beatus, qui intellegit de egeno;
in die mala liberabit eum Dominus.

³ Dominus servabit eum et vivificabit eum
et beatum faciet eum in terra
et non tradet eum in animam inimicorum eius.

⁴ Dominus opem feret illi super lectum doloris eius;
universum stratum eius versabis in infirmitate eius.

⁵ Ego dixi: “ Domine, miserere mei;
sana animam meam, quia peccavi tibi ”.

⁶ Inimici mei dixerunt mala mihi:
“ Quando morietur, et peribit nomen eius? ”.

⁷ Et si ingrediebatur, ut visitaret, vana loquebatur;
cor eius congregabat iniquitatem sibi,
egrediebatur foras et detrahebat.

⁸ Simul adversum me susurrabant omnes inimici mei;
adversum me cogitabant mala mihi:

⁹ “ Maleficium effusum est in eo;
et, qui decumbit, non adiciet ut resurgat ”.

¹⁰ Sed et homo pacis meae, in quo speravi,
qui edebat panem meum, levavit contra me calcaneum.

¹¹ Tu autem, Domine, miserere mei
et resuscita me, et retribuam eis.

¹² In hoc cognovi quoniam voluisti me,
quia non gaudebit inimicus meus super me;

¹³ me autem propter innocentiam suscepisti
et statuisti me in conspectu tuo in aeternum.

¹⁴ Benedictus Dominus, Deus Israel,
a saeculo et usque in saeculum. Fiat, fiat.