Salmi 73

¹ Psalmus. Asaph.
Quam bonus rectis est Deus,
Deus his, qui mundo sunt corde!

² Mei autem paene moti sunt pedes,
paene effusi sunt gressus mei,

³ quia zelavi super gloriantes,
pacem peccatorum videns.

⁴ Quia non sunt eis impedimenta,
sanus et pinguis est venter eorum.

⁵ In labore mortalium non sunt
et cum hominibus non flagellantur.

⁶ Ideo quasi torques est eis superbia,
et tamquam indumentum operuit eos violentia.

⁷ Prodit quasi ex adipe iniquitas eorum,
erumpunt cogitationes cordis.

⁸ Subsannaverunt et locuti sunt nequitiam,
iniquitatem ab excelso locuti sunt.

⁹ Posuerunt in caelo os suum,
et lingua eorum transivit in terra.

¹⁰ Ideo in alto sedent,
et aquae plenae non pervenient ad eos.

¹¹ Et dixerunt: “ Quomodo scit Deus,
et si est scientia in Excelso? ”.

¹² Ecce ipsi peccatores et abundantes in saeculo
multiplicaverunt divitias.

¹³ Et dixi: “ Ergo sine causa mundavi cor meum
et lavi in innocentia manus meas;

¹⁴ et fui flagellatus tota die,
et castigatio mea in matutinis ”.

¹⁵ Si dixissem: “ Loquar ut illi ”,
ecce generationem filiorum tuorum prodidissem.

¹⁶ Et cogitabam, ut cognoscerem hoc;
labor erat in oculis meis,

¹⁷ donec intravi in sanctuarium Dei
et intellexi novissima eorum.

¹⁸ Verumtamen in lubrico posuisti eos,
deiecisti eos in ruinas.

¹⁹ Quomodo facti sunt in desolationem!
Subito defecerunt, perierunt prae horrore.

²⁰ Velut somnium evigilantis, Domine,
surgens imaginem ipsorum contemnes.

²¹ Quia exacerbatum est cor meum,
et renes mei compuncti sunt;

²² et ego insipiens factus sum et nescivi:
ut iumentum factus sum apud te.

²³ Ego autem semper tecum;
tenuisti manum dexteram meam.

²⁴ In consilio tuo deduces me
et postea cum gloria suscipies me.

²⁵ Quis enim mihi est in caelo?
Et tecum nihil volui super terram.

²⁶ Defecit caro mea et cor meum;
Deus cordis mei, et pars mea Deus in aeternum.

²⁷ Quia ecce, qui elongant se a te, peribunt;
perdidisti omnes, qui fornicantur abs te.

²⁸ Mihi autem adhaerere Deo bonum est,
ponere in Domino Deo spem meam,
ut annuntiem omnes operationes tuas
in portis filiae Sion.