Salmi 147

¹ ALLELUIA.
Laudate Dominum, quoniam bonum est psallere Deo nostro,
quoniam iucundum est celebrare laudem.

² Aedificans Ierusalem Dominus,
dispersos Israelis congregabit.

³ Qui sanat contritos corde
et alligat plagas eorum;

⁴ qui numerat multitudinem stellarum
et omnibus eis nomina vocat.

⁵ Magnus Dominus noster et magnus virtute,
sapientiae eius non est numerus.

⁶ Sustentat mansuetos Dominus,
humilians autem peccatores usque ad terram.

⁷ Praecinite Domino in confessione,
psallite Deo nostro in cithara.

⁸ Qui operit caelum nubibus
et parat terrae pluviam.
Qui producit in montibus fenum
et herbam servituti hominum.

⁹ Qui dat iumentis escam ipsorum
et pullis corvorum invocantibus eum.

¹⁰ Non in fortitudine equi delectatur,
nec in tibiis viri beneplacitum est ei.

¹¹ Beneplacitum est Domino super timentes eum
et in eis, qui sperant super misericordia eius.

¹² Lauda, Ierusalem, Dominum;
collauda Deum tuum, Sion.

¹³ Quoniam confortavit seras portarum tuarum,
benedixit filiis tuis in te.

¹⁴ Qui ponit fines tuos pacem
et adipe frumenti satiat te.

¹⁵ Qui emittit eloquium suum terrae,
velociter currit verbum eius.

¹⁶ Qui dat nivem sicut lanam,
pruinam sicut cinerem spargit.

¹⁷ Mittit crystallum suam sicut buccellas;
ante faciem frigoris eius quis sustinebit?

¹⁸ Emittet verbum suum et liquefaciet ea,
flabit spiritus eius, et fluent aquae.

¹⁹ Qui annuntiat verbum suum Iacob,
iustitias et iudicia sua Israel.

²⁰ Non fecit taliter omni nationi
et iudicia sua non manifestavit eis. ALLELUIA.