Salmi 24

¹ David. Psalmus.
Domini est terra, et plenitudo eius,
orbis terrarum, et qui habitant in eo.

² Quia ipse super maria fundavit eum
et super flumina firmavit eum. -

³ Quis ascendet in montem Domini,
aut quis stabit in loco sancto eius?

⁴ Innocens manibus et mundo corde,
qui non levavit ad vana animam suam
nec iuravit in dolum.

⁵ Hic accipiet benedictionem a Domino
et iustificationem a Deo salutari suo.

⁶ Haec est generatio quaerentium eum,
quaerentium faciem Dei Iacob.

⁷ Attollite, portae, capita vestra,
et elevamini, portae aeternales,
et introibit rex gloriae.

⁸ Quis est iste rex gloriae?
Dominus fortis et potens,
Dominus potens in proelio.

⁹ Attollite, portae, capita vestra,
et elevamini, portae aeternales,
et introibit rex gloriae.

¹⁰ Quis est iste rex gloriae?
Dominus virtutum ipse est rex gloriae.