Psalmi 28

¹David.
Ad te, Domine, clamabo;
Deus meus, ne sileas a me.
Ne quando taceas a me,
et assimilabor descendentibus in lacum.
²Exaudi vocem deprecationis meae, dum clamo ad te,
dum extollo manus meas ad templum sanctum tuum.
³Ne simul trahas me cum peccatoribus
et cum operantibus iniquitatem.
Qui loquuntur pacem cum proximo suo,
mala autem in cordibus eorum.
⁴Da illis secundum opera eorum
et secundum nequitiam adinventionum ipsorum.
Secundum opus manuum eorum tribue illis,
redde retributionem eorum ipsis.
⁵Quoniam non intellexerunt opera Domini
et opus manuum eius,
destruet illos et non aedificabit eos.
⁶Benedictus Dominus,
quoniam exaudivit vocem deprecationis meae;
⁷Dominus adiutor meus et protector meus,
in ipso speravit cor meum, et adiutus sum,
et exsultavit cor meum,
et in cantico meo confitebor ei.
⁸Dominus fortitudo plebi suae,
et refugium salvationum christi sui est.
⁹Salvum fac populum tuum et benedic hereditati tuae
et pasce eos et extolle illos usque in aeternum.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati