Salmi 32

¹ David. Maskil.
Beatus, cui remissa est iniquitas,
et obtectum est peccatum.

² Beatus vir, cui non imputavit Dominus delictum,
nec est in spiritu eius dolus.

³ Quoniam tacui, inveteraverunt ossa mea,
dum rugirem tota die.

⁴ Quoniam die ac nocte gravata est super me manus tua,
immutatus est vigor meus in ardoribus aestatis.

⁵ Peccatum meum cognitum tibi feci
et delictum meum non abscondi.
Dixi: “ Confitebor adversum me iniquitatem meam Domino ”.
Et tu remisisti impietatem peccati mei.

⁶ Propter hoc orabit ad te omnis sanctus in tempore opportuno.
Et in diluvio aquarum multarum
ad eum non approximabunt.

⁷ Tu es refugium meum, a tribulatione conservabis me;
exsultationibus salutis circumdabis me.

⁸ Intellectum tibi dabo et instruam te in via, qua gradieris;
firmabo super te oculos meos.

⁹ Nolite fieri sicut equus et mulus,
quibus non est intellectus;
in camo et freno si accedis ad constringendum,
non approximant ad te.

¹⁰ Multi dolores impii,
sperantem autem in Domino misericordia circumdabit.

¹¹ Laetamini in Domino et exsultate, iusti;
et gloriamini, omnes recti corde.