Salmi 65

¹ Magistro chori. Psalmus. David. Canticum.

² Te decet hymnus, Deus, in Sion;
et tibi reddetur votum in Ierusalem.

³ Qui audis orationem,
ad te omnis caro veniet propter iniquitatem.

⁴ Etsi praevaluerunt super nos impietates nostrae,
tu propitiaberis eis.

⁵ Beatus, quem elegisti et assumpsisti; inhabitabit in atriis tuis.
Replebimur bonis domus tuae,
sanctitate templi tui.

⁶ Mirabiliter in aequitate
exaudies nos, Deus salutis nostrae,
spes omnium finium terrae et maris longinqui.

⁷ Firmans montes in virtute tua,
accinctus potentia.

⁸ Compescens sonitum maris,
sonitum fluctuum eius
et tumultum populorum.

⁹ Et timebunt, qui habitant terminos terrae, a signis tuis;
exitus orientis et occidentis delectabis.

¹⁰ Visitasti terram et inebriasti eam;
multiplicasti locupletare eam.
Flumen Dei repletum est aquis;
parasti frumenta illorum,
quoniam ita parasti eam.

¹¹ Sulcos eius irrigans, glebas eius complanans;
imbribus emollis eam, benedicis germini eius.

¹² Coronasti annum benignitate tua,
et vestigia tua stillabunt pinguedinem.

¹³ Stillabunt pascua deserti,
et exsultatione colles accingentur.

¹⁴ Induta sunt ovibus prata,
et valles abundabunt frumento;
clamabunt, etenim hymnum dicent.