Salmi 19

¹ Magistro chori. Psalmus. David.

² Caeli enarrant gloriam Dei,
et opera manuum eius annuntiat firmamentum.

³ Dies diei eructat verbum,
et nox nocti indicat scientiam.

⁴ Non sunt loquelae neque sermones,
quorum non intellegantur voces:

⁵ in omnem terram exivit sonus eorum,
et in fines orbis terrae verba eorum.

⁶ Soli posuit tabernaculum in eis,
et ipse, tamquam sponsus procedens de thalamo suo,
exsultavit ut gigas ad currendam viam.

⁷ A finibus caelorum egressio eius,
et occursus eius usque ad fines eorum,
nec est quod se abscondat a calore eius.

⁸ Lex Domini immaculata, reficiens animam,
testimonium Domini fidele, sapientiam praestans parvulis.

⁹ Iustitiae Domini rectae, laetificantes corda,
praeceptum Domini lucidum, illuminans oculos.

¹⁰ Timor Domini mundus, permanens in saeculum saeculi;
iudicia Domini vera, iusta omnia simul,

¹¹ desiderabilia super aurum et lapidem pretiosum multum,
et dulciora super mel et favum stillantem.

¹² Etenim servus tuus eruditur in eis;
in custodiendis illis retributio multa.

¹³ Errores quis intellegit?
Ab occultis munda me

¹⁴ et a superbia custodi servum tuum, ne dominetur mei,
Tunc immaculatus ero
et emundabor a delicto maximo.

¹⁵ Sint ut complaceant eloquia oris mei,
et meditatio cordis mei in conspectu tuo.
Domine, adiutor meus et redemptor meus.