Salmi 53

¹ Magistro chori. Secundum " Mahalat ". Maskil. David.
Dixit insipiens in corde suo: “ Non est Deus ”.

² Corrupti sunt et abominationes operati sunt;
non est qui faciat bonum.

³ Deus de caelo prospexit super filios hominum,
ut videat si est intellegens, aut requirens Deum.

⁴ Omnes declinaverunt, simul corrupti sunt;
non est qui faciat bonum, non est usque ad unum.

⁵ Nonne scient omnes, qui operantur iniquitatem,
qui devorant plebem meam ut cibum panis?
Deum non invocaverunt;

⁶ illic trepidaverunt timore, et non erat timor.
Quoniam Deus dissipavit ossa eorum, qui te obsidebant,
confusi sunt, quoniam Deus sprevit eos. -

⁷ Quis dabit ex Sion salutare Israel?
Cum converterit Deus captivitatem plebis suae,
exsultabit Iacob, et laetabitur Israel.