Psalmi 88

¹ Canticum. Psalmus. Filiorum Core. Magistro chori.
Secundum " Mahalat ". Ad cantandum. Maskil. Heman Ezrahitae.
²Domine, Deus salutis meae,
in die clamavi et nocte coram te.
³Intret in conspectu tuo oratio mea;
inclina aurem tuam ad precem meam.
⁴Quia repleta est malis anima mea,
et vita mea inferno appropinquavit.
⁵Aestimatus sum cum descendentibus in lacum,
factus sum sicut homo sine adiutorio.
⁶Inter mortuos liber,
sicut vulnerati dormientes in sepulcris;
quorum non es memor amplius,
et ipsi de manu tua abscissi sunt.
⁷Posuisti me in lacu inferiori,
in tenebrosis et in umbra mortis.
⁸Super me gravatus est furor tuus,
et omnes fluctus tuos induxisti super me.
⁹Longe fecisti notos meos a me,
posuisti me abominationem eis;
conclusus sum et non egrediar.
¹⁰Oculi mei languerunt prae afflictione.
Clamavi ad te, Domine, tota die,
expandi ad te manus meas. -
¹¹Numquid mortuis facies mirabilia,
aut surgent umbrae et confitebuntur tibi?
¹²Numquid narrabit aliquis in sepulcro misericordiam tuam
et veritatem tuam in loco perditionis?
¹³Numquid cognoscentur in tenebris mirabilia tua,
et iustitia tua in terra oblivionis?
¹⁴Et ego ad te, Domine, clamavi,
et mane oratio mea praeveniet te.
¹⁵Ut quid, Domine, repellis animam meam,
abscondis faciem tuam a me?
¹⁶Pauper sum ego et moriens a iuventute mea;
portavi pavores tuos et conturbatus sum.
¹⁷Super me transierunt irae tuae,
et terrores tui exciderunt me.
¹⁸Circuierunt me sicut aqua tota die,
circumdederunt me simul.
¹⁹Elongasti a me amicum et proximum,
et noti mei sunt tenebrae.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati