Salmi 4

¹ Magistro chori. Fidibus. Psalmus. David.

² Cum invocarem, exaudivit me Deus iustitiae meae.
In tribulatione dilatasti mihi;
miserere mei et exaudi orationem meam.

³ Filii hominum, usquequo gravi corde?
Ut quid diligitis vanitatem et quaeritis mendacium?

⁴ Et scitote quoniam mirificavit Dominus sanctum suum;
Dominus exaudiet, cum clamavero ad eum.

⁵ Irascimini et nolite peccare;
loquimini in cordibus vestris,
in cubilibus vestris et conquiescite.

⁶ Sacrificate sacrificium iustitiae
et sperate in Domino.

⁷ Multi dicunt: “ Quis ostendit nobis bona? ”.
Leva in signum super nos lumen vultus tui, Domine!

⁸ Maiorem dedisti laetitiam in corde meo,
quam cum multiplicantur frumentum et vinum eorum.

⁹ In pace in idipsum dormiam et requiescam,
quoniam tu, Domine, singulariter in spe constituisti me.