Salmi ܡܙܡܘܪܐ 22

²ܐܠܗܝ ܐܠܗܝ ܠܡܢܐ ܫܒܩܬܢܝ ܘܐܪܚܩܬ ܡܢ ܦܘܪܩܢܝ ܒܡ̈ܠܐ ܕܣ̈ܟܠܘܬܝ³ܐܠܗܝ ܐܩܪܝܟ ܒܐܝܡܡܐ ܘܠܐ ܬܥܢܝܢܝ ܘܒܠܠܝܐ ܘܠܐ ܬܟܬܪ ܠܝ⁴ܐܢܬ ܩܕܝܫ ܘܝܬܒ ܒܫܘܒܚܟ ܐܝܣܪܝܠ⁵ܒܟ ܣܒܪܘ ܐ̈ܒܗܝ ܣܒܪܘ ܒܟ ܘܦܨܝܬ ܐܢܘܢ⁶ܠܘܬܟ ܓܥܘ ܘܐܬܦܨܝܘ ܒܟ ܣܒܪܘ ܘܠܐ ܒܗܬܘ⁷ܐܢܐ ܬܘܠܥܐ ܐܢܐ ܘܠܐ ܒܪܢܫܐ ܚܣܕܐ ܕܒܢ̈ܝ ܐܢܫܐ ܘܣܘܠܢܗ ܕܥܡܐ⁸ܟܠ ܕܚܙܐܘܢܝ ܡܝܩܘ ܒܝ ܐܦܛܪܘ ܒܣ̈ܦܘܬܗܘܢ ܘܐܢܝܕܘ ܒܪ̈ܝܫܝܗܘܢ⁹ܐܬܬܟܠ ܥܠ ܡܪܝܐ ܕܢܦܨܝܘܗܝ ܘܢܦܠܛܝܘܗܝ ܐܢ ܨܒܐ ܒܗ¹⁰ܡܛܠ ܕܐܢܬ ܗܘ ܬܘܟܠܢܝ ܡܢ ܡܪܒܥܐ ܘܣܒܪܝ ܥܠ ܬܕܝ̈ܗ̇ ܕܐܡܝ¹¹ܥܠܝܟ ܐܫܬܕܝܬ ܡܢ ܡܪܒܥܐ ܘܡܢ ܟܪܣܗ̇ ܕܐܡܝ ܐܠܗܝ ܐܢܬ¹²ܠܐ ܬܪܚܩ ܡܢܝ ܡܛܠ ܕܐܘܠܨܢܐ ܩܪܒ ܘܠܝܬ ܕܡܥܕܪ¹³ܐܬܟܪܟܘܢܝ ܬܘܪ̈ܐ ܣ̈ܓܝܐܐ ܘܐܪ̈ܘܢܐ ܕܒܝܫܢ ܚܕܪܘܢܝ¹⁴ܦܬܚܘ ܥܠܝ ܦܘܡܗܘܢ ܐܝܟ ܐܪܝܐ ܕܢܗܡ ܘܚܛܦ¹⁵ܘܐܝܟ ܡ̈ܝܐ ܐܬܐܫܕܬ ܘܐܬܒܕܪܘ ܟܠܗܘܢ ܓܪ̈ܡܝ ܘܗܘܐ ܠܒܝ ܐܝܟ ܫܥܘܬܐ ܘܐܬܡܣܝܘ ܒܓܘ ܡ̈ܥܝ¹⁶ܘܝܒܫ ܐܝܟ ܚܨܦܐ ܕܦܚܪܐ ܚܝܠܝ ܘܠܫܢܝ ܕܒܩ ܠܫܡ̈ܝ ܚܟܝ ܘܥܠ ܥܦܪܐ ܕܡܘܬܐ ܫܕܝܬܢܝ¹⁷ܡܛܠ ܕܚܕܪܘܢܝ ܟܠܒ̈ܐ ܘܟܢܘܫܬܐ ܕܒܝܫ̈ܐ ܟܪܟܘܢܝ ܒܙܥܘ ܐ̈ܝܕܝ ܘܪ̈ܓܠܝ¹⁸ܘܐܝܠܠܘ ܟܘܠܗܘܢ ܓܪ̈ܡܝ ܗܢܘܢ ܚܪܘ ܘܚܙܘ ܒܝ¹⁹ܘܦܠܓܘ ܢܚ̈ܬܝ ܒܝܢܬܗܘܢ ܘܥܠ ܠܒܘܫܝ ܐܪܡܝܘ ܦܣܐ²⁰ܘܐܢܬ ܡܪܝܐ ܠܐ ܬܪܚܩ ܡܢܝ ܐܝܠ ܐܝܠ ܠܥܘܕܪܢܝ ܟܬܪ²¹ܘܦܨܗ̇ ܡܢ ܚܪܒܐ ܠܢܦܫܝ ܘܡܢ ܐܝܕܐ ܕܟܠܒ̈ܐ ܝܚܝܕܘܬܝ²²ܦܪܘܩܝܢܝ ܡܢ ܦܘܡܗ ܕܐܪܝܐ. ܘܡܢ ܩܪܢܐ ܪܡܬܐ ܡܘܟܟܝ²³ܕܐܣܒܪ ܫܡܟ ܠܐ̈ܚܝ ܘܒܓܘ ܟܢܘܫܬܐ ܐܫܒܚܟ²⁴ܕܚ̈ܠܘܗܝ ܕܡܪܝܐ ܫܒܚܘܗܝ ܘܟܠܗ ܙܪܥܗ ܕܝܥܩܘܒ ܐܘܩܪܘܗܝ ܘܕܚܠܘ ܡܢܗ ܟܠܗ ܙܪܥܗ ܕܐܝܣܪܝܠ²⁵ܡܛܠ ܕܠܐ ܫܛ ܘܠܐ ܐܣܠܝ ܓܥܬܗ ܕܡܣܟܢܐ ܘܠܐ ܐܗܦܟ ܐ̈ܦܘܗܝ ܡܢܗ ܟܕ ܓܥܐ ܠܘܬܗ ܫܡܥܗ²⁶ܡܢ ܩܕܡܝܟ ܗܝ ܬܫܒܘܚܬܝ ܒܥܕܬܐ ܪܒܬܐ ܢܕܪ̈ܝ ܐܫܠܡ ܩܕܡ ܕܚ̈ܠܘܗܝ²⁷ܢܐܟܠܘܢ ܡܣ̈ܟܢܐ ܘܢܣܒܥܘܢ ܘܢܫܒܚܘܢ ܠܡܪܝܐ ܐܝܠܝܢ ܕܒܥܝܢ ܠܗ ܘܢܚܐ ܠܒܗܘܢ ܠܥܠܡܝܢ²⁸ܢܬܕܟܪܘܢ ܘܢܬܦܢܘܢ ܠܘܬ ܡܪܝܐ ܟܠܗܘܢ ܥܒܪ̈ܝܗ̇ ܕܐܪܥܐ ܘܩܕܡܘܗܝ ܢܣ̈ܓܕܢ ܟܠܗܝܢ ܫܪ̈ܒܬܐ ܕܥܡ̈ܡܐ²⁹ܡܛܠ ܕܕܡܪܝܐ ܗܝ ܡܠܟܘܬܐ ܘܗܘܝܘ ܫܠܝܛ ܥܠ ܥܡ̈ܡܐ³⁰ܢܐܟܠܘܢ ܘܢܣܓܕܘܢ ܩܕܡ ܡܪܝܐ ܟܠܗܘܢ ܟܦܢ̈ܝܗ̇ ܕܐܪܥܐ ܘܩܕܡܘܗܝ ܢܒܪܟܘܢ ܟܠ ܢܚ̈ܬܝ ܥܦܪܐ. ܢܦܫܝ ܠܗ ܗܘ ܚܝܐ³¹ܙܪܥܐ ܕܢܦܠܚܝܘܗܝ ܢܣܒܪ ܕܪܗ ܠܡܪܝܐ³²ܢܐܬܘܢ ܘܢܚܘܘܢ ܙܕܝܩܘܬܗ ܠܥܡܐ ܕܡܬܝܠܕ ܕܥܒܕ ܡܪܝܐ

Cambia Bibbia

Confronta con un'altra Bibbia

Versetti esaminati