Proverbia 1

¹Parabolae Salomonis filii David regis Israel
²ad sciendam sapientiam et disciplinam,
ad intellegenda verba prudentiae;
³ad suscipiendam eruditionem doctrinae,
iustitiam et iudicium et aequitatem,
⁴ut detur parvulis astutia,
adulescenti scientia et recogitatio.
⁵Audiat sapiens et addet doctrinam,
et intellegens dispositiones possidebit:
⁶animadvertet parabolam et allegoriam,
verba sapientium et aenigmata eorum.
⁷Timor Domini principium scientiae.
Sapientiam atque doctrinam stulti despiciunt.
⁸Audi, fili mi, disciplinam patris tui
et ne reicias legem matris tuae,
⁹quia diadema gratiae sunt capiti tuo,
et torques collo tuo.
¹⁰Fili mi, si te lactaverint peccatores,
ne acquiescas eis.
¹¹Si dixerint: “ Veni nobiscum, insidiemur sanguini,
abscondamus tendiculas contra insontem frustra;
¹²deglutiamus eos sicut infernus viventes
et integros quasi descendentes in lacum:
¹³omnem pretiosam substantiam reperiemus,
implebimus domos nostras spoliis;
¹⁴sortem mitte nobiscum,
marsupium unum sit omnium nostrum ”;
¹⁵fili mi, ne ambules cum eis,
prohibe pedem tuum a semitis eorum.
¹⁶Pedes enim illorum ad malum currunt
et festinant, ut effundant sanguinem.
¹⁷Frustra autem iacitur rete ante oculos pinnatorum.
¹⁸Ipsique contra sanguinem suum insidiantur
et moliuntur fraudes contra animas suas.
¹⁹Sic semitae omnis ad rapinam intenti:
animam ipsius possidentis rapiunt.
²⁰Sapientia foris praedicat,
in plateis dat vocem suam,
²¹in capite viarum frequentium clamitat,
in foribus portarum urbis profert verba sua:
²²“ Usquequo, parvuli, diligitis infantiam,
et derisores sibi derisionem cupient,
et imprudentes odibunt scientiam?
²³Convertimini ad correptionem meam;
en proferam vobis spiritum meum
et ostendam vobis verba mea.
²⁴Quia vocavi, et renuistis,
extendi manum meam, et non fuit qui aspiceret;
²⁵despexistis omne consilium meum
et increpationes meas neglexistis.
²⁶Ego quoque in interitu vestro ridebo
et subsannabo, cum terror vobis advenerit,
²⁷cum irruerit ut procella terror,
et interitus quasi tempestas ingruerit,
quando venerit super vos tribulatio et angustia ”.
²⁸Tunc invocabunt me, et non exaudiam,
instanter quaerent me et non invenient me,
²⁹eo quod exosam habuerint disciplinam
et timorem Domini non elegerint
³⁰nec acquieverint consilio meo
et despexerint universam correptionem meam.
³¹Comedent igitur fructus viae suae
suisque consiliis saturabuntur.
³²Aversio parvulorum interficiet eos,
et securitas stultorum perdet illos.
³³Qui autem me audierit, absque terrore requiescet
et tranquillus erit timore malorum sublato.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati