Salmi 89

¹ Maskil. Ethan Ezrahitae.

² Misericordias Domini in aeternum cantabo;
in generationem et generationem
annuntiabo veritatem tuam in ore meo.

³ Quoniam dixisti: “ In aeternum misericordia aedificabitur ”,
in caelis firmabitur veritas tua.

⁴ “ Disposui testamentum electo meo,
iuravi David servo meo:

⁵ Usque in aeternum confirmabo semen tuum
et aedificabo in generationem et generationem sedem tuam ”.

⁶ Confitebuntur caeli mirabilia tua, Domine,
etenim veritatem tuam in ecclesia sanctorum.

⁷ Quoniam quis in nubibus aequabitur Domino,
similis erit Domino in filiis Dei?

⁸ Deus, metuendus in consilio sanctorum,
magnus et terribilis super omnes, qui in circuitu eius sunt.

⁹ Domine, Deus virtutum, quis similis tibi?
Potens es, Domine, et veritas tua in circuitu tuo.

¹⁰ Tu dominaris superbiae maris,
elationes fluctuum eius tu mitigas.

¹¹ Tu conculcasti sicut vulneratum Rahab,
in brachio virtutis tuae dispersisti inimicos tuos.

¹² Tui sunt caeli, et tua est terra,
orbem terrae et plenitudinem eius tu fundasti;

¹³ Aquilonem et austrum tu creasti,
Thabor et Hermon in nomine tuo exsultabunt.

¹⁴ Tibi brachium cum potentia;
firma est manus tua, et exaltata dextera tua.

¹⁵ Iustitia et iudicium firmamentum sedis tuae.
Misericordia et veritas praecedent faciem tuam.

¹⁶ Beatus populus, qui scit iubilationem.
Domine, in lumine vultus tui ambulabunt

¹⁷ et in nomine tuo exsultabunt tota die et in iustitia tua exaltabuntur,

¹⁸ quoniam decor virtutis eorum tu es,
et in beneplacito tuo exaltabitur cornu nostrum.

¹⁹ Quia Domini est scutum nostrum,
et Sancti Israel rex noster.

²⁰ Tunc locutus es in visione sanctis tuis et dixisti:
“ Posui adiutorium in potente
et exaltavi electum de plebe.

²¹ Inveni David servum meum;
oleo sancto meo unxi eum.

²² Manus enim mea firma erit cum eo, et brachium meum confortabit eum.

²³ Nihil proficiet inimicus in eo,
et filius iniquitatis non opprimet eum.

²⁴ Et concidam a facie ipsius inimicos eius
et odientes eum percutiam.

²⁵ Et veritas mea et misericordia mea cum ipso,
et in nomine meo exaltabitur cornu eius.

²⁶ Et ponam super mare manum eius
et super flumina dexteram eius.

²⁷ Ipse invocabit me: “Pater meus es tu,
Deus meus et refugium salutis meae”.

²⁸ Et ego primogenitum ponam illum,
excelsum prae regibus terrae.

²⁹ In aeternum servabo illi misericordiam meam;
et testamentum meum fidele ipsi.

³⁰ Et ponam in saeculum saeculi semen eius;
et thronum eius sicut dies caeli.

³¹ Si autem dereliquerint filii eius legem meam
et in iudiciis meis non ambulaverint,

³² si iustificationes meas profanaverint
et mandata mea non custodierint,

³³ visitabo in virga delictum eorum
et in verberibus iniquitatem eorum.

³⁴ Misericordiam autem meam non avertam ab eo
neque mentiar in veritate mea.

³⁵ Non profanabo testamentum meum et, quae procedunt de labiis meis, non faciamirrita.

³⁶ Semel iuravi in sancto meo: David non mentiar.

³⁷ Semen eius in aeternum manebit,
et thronus eius sicut sol in conspectu meo

³⁸ et sicut luna firmus stabit in aeternum
et testis in caelo fidelis ”.

³⁹ Tu vero reppulisti et reiecisti,
iratus es contra christum tuum;

⁴⁰ evertisti testamentum servi tui,
profanasti in terram diadema eius.

⁴¹ Destruxisti omnes muros eius,
posuisti munitiones eius in ruinas.

⁴² Diripuerunt eum omnes transeuntes viam,
factus est opprobrium vicinis suis.

⁴³ Exaltasti dexteram deprimentium eum,
laetificasti omnes inimicos eius.

⁴⁴ Avertisti aciem gladii eius
et non es auxiliatus ei in bello.

⁴⁵ Finem posuisti splendori eius
et sedem eius in terram collisisti.

⁴⁶ Minorasti dies iuventutis eius,
perfudisti eum confusione.

⁴⁷ Usquequo, Domine, absconderis in finem,
exardescet sicut ignis ira tua?

⁴⁸ Memorare, quam brevis mea substantia.
Ad quam vanitatem creasti omnes filios hominum?

⁴⁹ Quis est homo, qui vivet et non videbit mortem,
eruet animam suam de manu inferi?

⁵⁰ Ubi sunt misericordiae tuae antiquae, Domine,
sicut iurasti David in veritate tua?

⁵¹ Memor esto, Domine, opprobrii servorum tuorum,
quod continui in sinu meo, multarum gentium,

⁵² quo exprobraverunt inimici tui, Domine,
quo exprobraverunt vestigia christi tui.

⁵³ Benedictus Dominus in aeternum. Fiat, fiat.