Salmi 7

NOVA VULGATA	VULGATA
1 Lamentatio David, quam cantavit Domino propter Chus Beniaminitam.	1 Psalmus David, quem cantavit Domino pro verbis Chusi, filii Jemini.
2 Domine Deus meus, in te speravi; salvum me fac ex omnibus persequentibus me et libera me,	2 Domine Deus meus, in te speravi ; salvum me fac ex omnibus persequentibus me, et libera me :
3 ne quando rapiat ut leo animam meam discerpens, dum non est qui salvum faciat.	3 nequando rapiat ut leo animam meam, dum non est qui redimat, neque qui salvum faciat.
4 Domine Deus meus, si feci istud, si est iniquitas in manibus meis,	4 Domine Deus meus, si feci istud, si est iniquitas in manibus meis,
5 si reddidi retribuenti mihi mala et exspoliavi inimicum meum dimittens inanem,	5 si reddidi retribuentibus mihi mala, decidam merito ab inimicis meis inanis.
6 persequatur inimicus animam meam et comprehendat et conculcet in terra vitam meam et gloriam meam in pulverem deducat.	6 Persequatur inimicus animam meam, et comprehendat ; et conculcet in terra vitam meam, et gloriam meam in pulverem deducat.
7 Exsurge, Domine, in ira tua et exaltare contra indignationem inimicorum meorum et exsurge, Deus meus, in iudicio, quod mandasti.	7 Exsurge, Domine, in ira tua, et exaltare in finibus inimicorum meorum : et exsurge, Domine Deus meus, in præcepto quod mandasti,
8 Et synagoga populorum circumdabit te, et super hanc in altum regredere:	8 et synagoga populorum circumdabit te : et propter hanc in altum regredere :
9 Dominus iudicat populos. Iudica me, Domine, secundum iustitiam meam et secundum innocentiam meam, quae est in me.	9 Dominus judicat populos. Judica me, Domine, secundum justitiam meam, et secundum innocentiam meam super me.
10 Consumatur nequitia peccatorum; et iustum confirma: scrutans corda et renes Deus iustus.	10 Consumetur nequitia peccatorum, et diriges justum, scrutans corda et renes, Deus.
11 Adiutorium meum apud Deum, qui salvos facit rectos corde.	11 Justum adjutorium meum a Domino, qui salvos facit rectos corde.
12 Deus iudex iustus, fortis, irascens per singulos dies.	12 Deus judex justus, fortis, et patiens ; numquid irascitur per singulos dies ?
13 Nonne iterum gladium suum exacuit, arcum suum tetendit et paravit illum?	13 Nisi conversi fueritis, gladium suum vibrabit ; arcum suum tetendit, et paravit illum.
14 Et paravit sibi vasa mortis, sagittas suas ardentes effecit.	14 Et in eo paravit vasa mortis, sagittas suas ardentibus effecit.
15 Ecce parturiit iniustitiam, concepit dolorem et peperit iniquitatem;	15 Ecce parturiit injustitiam ; concepit dolorem, et peperit iniquitatem.
16 lacum aperuit et effodit eum et incidit in foveam, quam fecit.	16 Lacum aperuit, et effodit eum ; et incidit in foveam quam fecit.
17 Convertetur dolor eius in caput eius, et in verticem ipsius iniquitas eius descendet.	17 Convertetur dolor ejus in caput ejus, et in verticem ipsius iniquitas ejus descendet.
18 Confitebor Domino secundum iustitiam eius et psallam nomini Domini Altissimi.	18 Confitebor Domino secundum justitiam ejus, et psallam nomini Domini altissimi.