Psalmi - 139

¹ Magistro chori. David. Psalmus.Domine, scrutatus es et cognovisti me,
²tu cognovisti sessionem meam et resurrectionem meam.Intellexisti cogitationes meas de longe,
³semitam meam et accubitum meum investigasti.Et omnes vias meas perspexisti,
⁴quia nondum est sermo in lingua mea,et ecce, Domine, tu novisti omnia.
⁵A tergo et a fronte coartasti meet posuisti super me manum tuam.
⁶Mirabilis nimis facta est scientia tua super me,sublimis, et non attingam eam.
⁷Quo ibo a spiritu tuoet quo a facie tua fugiam?
⁸Si ascendero in caelum, tu illic es;si descendero in infernum, ades.
⁹Si sumpsero pennas auroraeet habitavero in extremis maris,
¹⁰etiam illuc manus tua deducet me,et tenebit me dextera tua.
¹¹Si dixero: “ Forsitan tenebrae compriment me,et nox illuminatio erit circa me ”,
¹²etiam tenebrae non obscurabuntur a te,et nox sicut dies illuminabitur- sicut tenebrae eius ita et lumen eius -.
¹³Quia tu formasti renes meos,contexuisti me in utero matris meae.
¹⁴Confitebor tibi, quia mirabiliter plasmatus sum;mirabilia opera tua,et anima mea cognoscit nimis.
¹⁵Non sunt abscondita ossa mea a te,cum factus sum in occulto,contextus in inferioribus terrae.
¹⁶Imperfectum adhuc me viderunt oculi tui,et in libro tuo scripti erant omnes dies:ficti erant, et nondum erat unus ex eis.
¹⁷Mihi autem nimis pretiosae cogitationes tuae, Deus;nimis gravis summa earum.
¹⁸Si dinumerabo eas, super arenam multiplicabuntur;si ad finem pervenerim, adhuc sum tecum.
¹⁹Utinam occidas, Deus, peccatores;viri sanguinum, declinate a me.
²⁰Qui loquuntur contra te maligne:exaltantur in vanum contra te.
²¹Nonne, qui oderunt te, Domine, oderamet insurgentes in te abhorrebam?
²²Perfecto odio oderam illos,et inimici facti sunt mihi.
²³Scrutare me, Deus, et scito cor meum;proba me et cognosce semitas meas
²⁴et vide, si via vanitatis in me est,et deduc me in via aeterna.