Psalmi - 77

¹ Magistro chori. Secundum Idithun. Asaph. Psalmus.
²Voce mea ad Dominum clamavi;voce mea ad Deum, et intendit mihi.
³In die tribulationis meae Deum exquisivi,manus meae nocte expansae suntet non fatigantur.Renuit consolari anima mea;
⁴memor sum Dei et ingemisco,exerceor, et deficit spiritus meus.
⁵Vigiles tenuisti palpebras oculi mei; turbatus sum et non sum locutus.
⁶Cogitavi dies antiquoset annos aeternos in mente habui.
⁷Meditatus sum nocte cum corde meoet exercitabar et scobebam spiritum meum.
⁸Numquid in aeternum proiciet Deus,aut non apponet, ut complacitior sit adhuc?
⁹Aut deficiet in finem misericordia sua,cessabit verbum a generatione in generationem?
¹⁰Aut obliviscetur misereri Deus,aut continebit in ira sua misericordias suas?
¹¹Et dixi: “ Hoc vulnus meum:mutatio dexterae Excelsi ”.
¹²Memor ero operum Domini,memor ero ab initio mirabilium tuorum.
¹³Et meditabor in omnibus operibus tuiset in adinventionibus tuis exercebor.
¹⁴Deus, in sancto via tua;quis deus magnus sicut Deus noster?
¹⁵Tu es Deus, qui facis mirabilia,notam fecisti in populis virtutem tuam.
¹⁶Redemisti in brachio tuo populum tuum,filios Iacob et Ioseph.
¹⁷Viderunt te aquae, Deus,viderunt te aquae et doluerunt;etenim commotae sunt abyssi.
¹⁸Effuderunt aquas nubila,vocem dederunt nubes,etenim sagittae tuae transeunt.
¹⁹Vox tonitrui tui in rota;illuxerunt coruscationes tuae orbi terrae,commota est et contremuit terra.
²⁰In mari via tua, et semitae tuae in aquis multis;et vestigia tua non cognoscuntur.
²¹Deduxisti sicut oves populum tuumin manu Moysi et Aaron.