---

¹ Magistro chori. David, servi Domini.
²Susurrat iniquitas ad impium in medio cordis eius;
non est timor Dei ante oculos eius.
³Quoniam blanditur ipsi in conspectu eius,
ut non inveniat iniquitatem suam et oderit.
⁴Verba oris eius iniquitas et dolus,
desiit intellegere, ut bene ageret.
⁵Iniquitatem meditatus est in cubili suo,
astitit omni viae non bonae,
malitiam autem non odivit.
⁶Domine, in caelo misericordia tua,
et veritas tua usque ad nubes;
⁷iustitia tua sicut montes Dei,
iudicia tua abyssus multa:
homines et iumenta salvabis, Domine.
⁸Quam pretiosa misericordia tua, Deus!
Filii autem hominum in tegmine alarum tuarum sperabunt;
⁹inebriabuntur ab ubertate domus tuae,
et torrente voluptatis tuae potabis eos.
¹⁰Quoniam apud te est fons vitae,
et in lumine tuo videbimus lumen.
¹¹Praetende misericordiam tuam scientibus te
et iustitiam tuam his, qui recto sunt corde.
¹²Non veniat mihi pes superbiae,
et manus peccatoris non moveat me.
¹³Ibi ceciderunt, qui operantur iniquitatem,
expulsi sunt nec potuerunt stare.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc