Psalms 30

¹ Psalmus. Canticum festi Dedicationis Templi. David.

²Exaltabo te, Domine, quoniam extraxisti me
nec delectasti inimicos meos super me.

³Domine Deus meus, clamavi ad te, et sanasti me.

⁴Domine, eduxisti ab inferno animam meam,
vivificasti me, ut non descenderem in lacum.

⁵Psallite Domino, sancti eius,
et confitemini memoriae sanctitatis eius,

⁶quoniam ad momentum indignatio eius,
et per vitam voluntas eius.
Ad vesperum demoratur fletus,
ad matutinum laetitia.

⁷Ego autem dixi in securitate mea:
“ Non movebor in aeternum ”.

⁸Domine, in voluntate tua
praestitisti decori meo virtutem;
avertisti faciem tuam a me,
et factus sum conturbatus.

⁹Ad te, Domine, clamabam
et ad Deum meum deprecabar.

¹⁰Quae utilitas in sanguine meo,
dum descendo in corruptionem?
Numquid confitebitur tibi pulvis
aut annuntiabit veritatem tuam?

¹¹Audivit Dominus et misertus est mei,
Dominus factus est adiutor meus.

¹²Convertisti planctum meum in choros mihi,
conscidisti saccum meum et accinxisti me laetitia,

¹³ut cantet tibi gloria mea et non taceat.
Domine Deus meus, in aeternum confitebor tibi.