Salmi 80

¹ Magistro chori. Secundum " Lilium praecepti ".
Asaph. Psalmus.

² Qui pascis Israel, intende,
qui deducis velut ovem Ioseph.
Qui sedes super cherubim, effulge

³ coram Ephraim, Beniamin et Manasse.
Excita potentiam tuam et veni,
ut salvos facias nos.

⁴ Deus, converte nos,
illustra faciem tuam, et salvi erimus.

⁵ Domine, Deus virtutum,
quousque irasceris super orationem populi tui?

⁶ Cibasti nos pane lacrimarum
et potum dedisti nobis in lacrimis copiose.

⁷ Posuisti nos in contradictionem vicinis nostris,
et inimici nostri subsannaverunt nos.

⁸ Deus virtutum, converte nos,
illustra faciem tuam, et salvi erimus.

⁹ Vineam de Aegypto transtulisti,
eiecisti gentes et plantasti eam.

¹⁰ Purgasti locum in conspectu eius,
plantasti radices eius, et implevit terram.

¹¹ Operti sunt montes umbra eius,
et ramis eius cedri Dei;

¹² extendit palmites suos usque ad mare
et usque ad flumen propagines suas.

¹³ Ut quid destruxisti maceriam eius,
et vindemiant eam omnes, qui praetergrediuntur viam?

¹⁴ Exterminavit eam aper de silva,
et singularis ferus depastus est eam.

¹⁵ Deus virtutum, convertere,
respice de caelo et vide et visita vineam istam.

¹⁶ Et protege eam, quam plantavit dextera tua,
et super filium hominis, quem confirmasti tibi.

¹⁷ Incensa est igni et suffossa;
ab increpatione vultus tui peribunt.

¹⁸ Fiat manus tua super virum dexterae tuae,
super filium hominis, quem confirmasti tibi.

¹⁹ Et non discedemus a te, vivificabis nos,
et nomen tuum invocabimus.

²⁰ Domine, Deus virtutum, converte nos
et illustra faciem tuam, et salvi erimus.