Psalmi 20

¹ Magistro chori. Psalmus. David.

² Exaudiat te Dominus in die tribulationis,
protegat te nomen Dei Iacob.

³ Mittat tibi auxilium de sancto
et de Sion tueatur te.

⁴ Memor sit omnis sacrificii tui
et holocaustum tuum pingue habeat.

⁵ Tribuat tibi secundum cor tuum
et omne consilium tuum adimpleat.

⁶ Laetabimur in salutari tuo
et in nomine Dei nostri levabimus signa;
impleat Dominus omnes petitiones tuas.

⁷ Nunc cognovi quoniam salvum fecit Dominus christum suum:
exaudivit illum de caelo sancto suo,
in virtutibus salutis dexterae eius.

⁸ Hi in curribus, et hi in equis,
nos autem nomen Domini Dei nostri invocavimus.

⁹ Ipsi incurvati sunt et ceciderunt,
nos autem surreximus et erecti sumus.

¹⁰ Domine, salvum fac regem,
et exaudi nos in die, qua invocaverimus te.