Psalmi 63

¹ Psalmus. David, cum in deserto Iudae commoraretur.

² Deus, Deus meus es tu, ad te de luce vigilo.
Sitivit in te anima mea,
te desideravit caro mea.
In terra deserta et arida et inaquosa,

³ sic in sancto apparui tibi,
ut viderem virtutem tuam et gloriam tuam.

⁴ Quoniam melior est misericordia tua super vitas,
labia mea laudabunt te.

⁵ Sic benedicam te in vita mea
et in nomine tuo levabo manus meas.

⁶ Sicut adipe et pinguedine repleatur anima mea,
et labiis exsultationis laudabit os meum.

⁷ Cum memor ero tui super stratum meum,
in matutinis meditabor de te,

⁸ quia fuisti adiutor meus,
et in velamento alarum tuarum exsultabo.

⁹ Adhaesit anima mea post te,
me suscepit dextera tua.

¹⁰ Ipsi vero in ruinam quaesierunt animam meam,
introibunt in inferiora terrae,

¹¹ tradentur in potestatem gladii,
partes vulpium erunt.

¹² Rex vero laetabitur in Deo;
gloriabuntur omnes, qui iurant in eo,
quia obstructum est os loquentium iniqua.