Jó 15

¹Respondens autem Eliphaz Themanites dixit:
²“ Numquid sapiens respondebit sapientia ventosa
et implebit vento urente stomachum suum?
³Arguens verbis, quae nihil prosunt,
et sententiis, quae nihil iuvant?
⁴Tu autem pietatem dissolvis
et detrahis meditationi coram Deo.⁵Docet enim iniquitas tua os tuum,
et assumis linguam callidorum.
⁶Condemnabit te os tuum et non ego,
et labia tua respondebunt tibi.
⁷Numquid primus homo tu natus es
et ante colles formatus?
⁸Numquid consilium Dei audisti
et tibi attrahis sapientiam?
⁹Quid nosti, quod nos ignoremus?
Quid intellegis, quod nos nesciamus?
¹⁰Et senes et antiqui sunt inter nos,
multo vetustiores quam pater tuus.¹¹Numquid parum tibi sunt consolationes Dei?
Et verbum lene tecum factum?
¹²Quid te elevat cor tuum,
et cur attonitos habes oculos?
¹³Quid vertis contra Deum spiritum tuum
et profers de ore tuo huiuscemodi sermones?
¹⁴Quid est homo, ut immaculatus sit,
et ut iustus appareat natus de muliere?
¹⁵Ecce, sanctis suis non fidit,
et caeli non sunt mundi in conspectu eius;
¹⁶quanto magis abominabilis et corruptus homo,
qui bibit quasi aquam iniquitatem.¹⁷Ostendam tibi, audi me;
quod vidi, narrabo tibi,
¹⁸quod sapientes confitentur,
et non celaverunt eos patres eorum:¹⁹quibus solis data est terra,
et non transivit alienus per eos.
²⁰Cunctis diebus suis impius cruciatur,
et numerus annorum incertus est tyranno.
²¹Sonitus terroris semper in auribus illius,
quasi, cum pax sit, vastator irruat in eum.
²²Non credit quod reverti possit de tenebris,
cum sit destinatus gladio.
²³Cum se moverit ad quaerendum panem: “Ubinam?”,
novit quod paratus sit in manu eius tenebrarum dies.
²⁴Terrebit eum tribulatio et angustia,
vallabit eum sicut regem, qui praeparatur ad proelium.
²⁵Tetendit enim adversus Deum manum suam,
et contra Omnipotentem roboratus est.
²⁶Cucurrit adversus eum erecto collo,
spisso scuto armatus.
²⁷Operuit faciem eius crassitudo,
et de lateribus eius arvina dependet.
²⁸Habitavit in civitatibus desolatis
et in domibus desertis, quae in tumulos sunt redactae.
²⁹Non ditabitur, nec perseverabit substantia eius;
nec mittet in terra radicem suam.
³⁰Non recedet de tenebris;
ramos eius arefaciet flamma,
et auferet ventus florem eius.
³¹Ne credat vanitati errore deceptus,
quia vanitas erit remuneratio eius.
³²Antequam dies eius impleantur, abscindentur,
et ramus eius non virescet.
³³Laedetur quasi vinea in primo flore botrus eius,
et quasi oliva proiciens florem suum.
³⁴Cangregatio enim impii sterilis,
et ignis devorabit tabernacula eorum, qui munera libenter accipiunt.
³⁵Concepit dolorem et peperit iniquitatem,
et venter eius praeparat dolos.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati