Giobbe 40

¹ Et respondens Dominus locutus est ad Iob:

² “ Numquid contendit cum Omnipotente reprehensor?
Qui arguit Deum, debet respondere ad ea ”.

³ Respondens autem Iob Domino dixit:

⁴ “ Ecce leviter locutus sum, quid respondebo tibi?
Manum meam ponam super os meum.

⁵ Unum locutus sum, quod non repetam,
et alterum, quibus ultra non addam ”.

⁶ Respondens autem Dominus Iob de turbine dixit:

⁷ “ Accinge sicut vir lumbos tuos;
interrogabo te, et edoce me.

⁸ Numquid irritum facies iudicium meum
et condemnabis me, ut tu iustificeris?

⁹ Et si habes brachium sicut Deus
et si voce simili tonas?

¹⁰ Circumda tibi decorem et sublimitatem;
gloria et decore induere.

¹¹ Effunde vehementiam furoris tui
et respiciens omnem arrogantem humilia.

¹² Respice cunctos superbos et confunde eos
et contere impios in loco suo.

¹³ Absconde eos in pulvere simul
et facies eorum claude in fovea;

¹⁴ et ego confitebor
quod salvare te possit dextera tua.

¹⁵ Ecce Behemoth, quem feci tecum;
fenum quasi bos comedit.

¹⁶ Fortitudo eius in lumbis eius,
et virtus illius in umbilico ventris eius.

¹⁷ Stringit caudam suam quasi cedrum,
nervi femorum eius perplexi sunt.

¹⁸ Ossa eius velut fistulae aeris,
cartilago illius quasi laminae ferreae.

¹⁹ Ipse est principium viarum Dei;
qui fecit eum, applicabit gladium eius.

²⁰ Huic montes tributum ferunt,
omnes bestiae agri ludunt ibi.

²¹ Sub lotis silvestribus dormit,
in secreto calami et in locis umentibus;

²² loti silvestres umbra eum protegunt,
circumdant eum salices torrentis.

²³ Si fluvius intumescat, non tremit;
securus est, si prorumpat fluctus ad os eius.

²⁴ In oculis eius quis capiet eum
et in sudibus perforabit nares eius?

²⁵ An extrahere poteris Leviathan hamo
et fune ligabis linguam eius?

²⁶ Numquid pones iuncum in naribus eius
aut spina perforabis maxillam eius?

²⁷ Numquid multiplicabit ad te preces
aut loquetur tibi mollia?

²⁸ Numquid feriet tecum pactum,
et accipies eum servum sempiternum?

²⁹ Numquid illudes ei quasi avi
aut ligabis eum pro puellis tuis?

³⁰ Speculabuntur super eum socii,
divident illum negotiatores?

³¹ Numquid implebis telis pellem eius
et iaculo hamato piscium caput illius?

³² Pone super eum manum tuam;
memento belli nec ultra addas.