Giobbe 26

¹ Respondens autem Iob dixit:

² “ Quomodo adiuvisti imbecillem?
Et sustentas brachium eius, qui non est fortis?

³ Quod dedisti illi consilium, qui non habet sapientiam?
Et prudentiam tuam ostendisti plurimam!

⁴ Quem docere voluisti?
Et cuius est spiritus, qui egreditur ex te?

⁵ Ecce umbrae gemunt sub aquis,
et qui habitant cum eis.

⁶ Nudus est infernus coram illo,
et nullum est operimentum Perditioni.

⁷ Qui extendit aquilonem super vacuum
et appendit terram super nihilum.

⁸ Qui ligat aquas in nubibus suis,
ut non erumpant pariter deorsum.

⁹ Qui operit faciem solii sui
expandens super illud nebulam suam.

¹⁰ Terminum circumdedit aquis,
usque dum finiantur lux et tenebrae.

¹¹ Columnae caeli contremiscunt
et pavent ab increpatione eius.

¹² In fortitudine sua terruit mare
et prudentia sua percussit Rahab.

¹³ Spiritus eius serenavit caelos,
et manus eius confodit colubrum fugientem.

¹⁴ Ecce haec sunt termini viarum eius;
et, cum vix parvam stillam sermonis eius audierimus,
quis poterit tonitruum magnitudinis illius intueri? ”.