Jó 19

¹ Respondens autem Iob dixit:

² “ Usquequo affligitis ani mam meam
et atteritis me sermonibus?

³ En decies obiurgatis me
et non erubescitis opprimentes me.

⁴ Nempe, etsi erravi,
mecum erit error meus.

⁵ Si vos contra me erigimini
et arguitis me opprobriis meis,

⁶ saltem nunc intellegite quia Deus non aequo iudicio afflixerit me
et rete suo me cinxerit.

⁷ Etsi clamo: Vim patior!, non exaudior;
si vociferor, non est qui iudicet.

⁸ Semitam meam circumsaepsit, et transire non possum;
et in calle meo tenebras posuit.

⁹ Spoliavit me gloria mea
et abstulit coronam de capite meo.

¹⁰ Destruxit me undique, et pereo,
et evellit quasi arborem spem meam.

¹¹ Iratus est contra me furor eius,
et sic me habuit quasi hostem suum.

¹² Simul venerunt turmae eius
et fecerunt sibi viam adversus me
et obsederunt in gyro tabernaculum meum.

¹³ Fratres meos longe fecit a me,
et noti mei quasi alieni recesserunt a me.

¹⁴ Dereliquerunt me propinqui mei,
et, qui me noverant, obliti sunt mei.

¹⁵ Inquilini domus meae et ancillae meae sicut alienum habuerunt me,
et quasi peregrinus fui in oculis eorum.

¹⁶ Servum meum vocavi, et non respondit;
ore proprio deprecabar illum.

¹⁷ Halitum meum exhorruit uxor mea,
et fetui filiis uteri mei.

¹⁸ Vel infantes despiciebant me
et, cum surgerem, detrahebant mihi.

¹⁹ Abominati sunt me quondam consiliarii mei;
et, quem maxime diligebam, aversatus est me.

²⁰ Pelli meae, consumptis carnibus, adhaesit os meum,
et evanuit cutis mea circa dentes meos.

²¹ Miseremini mei, miseremini mei, saltem vos, amici mei,
quia manus Domini tetigit me.

²² Quare persequimini me sicut Deus
et carnibus meis non saturamini?

²³ Quis mihi tribuat, ut scribantur sermones mei?
Quis mihi det, ut exarentur in libro

²⁴ stilo ferreo et plumbeo,
in aeternum sculpantur in silice?

²⁵ Scio enim quod redemptor meus vivit
et in novissimo super pulvere stabit;

²⁶ et post pellem meam hanc, quam abstraxerunt,
et de carne mea videbo Deum.

²⁷ Quem visurus sum ego ipse,
et oculi mei conspecturi sunt, et non alienum.
Consumpti sunt renes mei in sinu meo.

²⁸ Si ergo nunc dicitis: “Quomodo persequemur eum
et radicem verbi inveniemus contra eum?”,

²⁹ timete a facie gladii,
quoniam ultor iniquitatum gladius est;
et scitote esse iudicium ”.