---

¹ Magistro chori. Secundum " Ionat elem rehoqim ".
David. Miktam. Cum Gath Philistaei eum tenerent.
²Miserere mei, Deus, quoniam conculcavit me homo,
tota die impugnans oppressit me.
³Conculcaverunt me inimici mei tota die,
quoniam multi pugnant adversum me, Altissime.
⁴In quacumque die timebo,
ego in te sperabo.
⁵In Deo, cuius laudabo sermonem,
in Deo speravi;
non timebo: quid faciet mihi caro?
⁶Tota die rem meam perturbabant,
adversum me omnes cogitationes eorum in malum.
⁷Concitabant iurgia, insidiabantur,
ipsi calcaneum meum observabant.
Sicut quaesierunt animam meam,
⁸ita pro iniquitate retribue illis,
in ira populos prosterne, Deus.
⁹Peregrinationes meas tu numerasti:
pone lacrimas meas in utre tuo;
nonne in supputatione tua?
¹⁰Tunc convertentur inimici mei retrorsum,
in quacumque die invocavero:
ecce cognovi quoniam Deus meus es.
¹¹In Deo, cuius laudabo sermonem,
in Domino, cuius laudabo sermonem,
¹²in Deo speravi;
non timebo: quid faciet mihi homo?
¹³Super me sunt, Deus, vota tua;
reddam laudationes tibi,
¹⁴quoniam eripuisti animam meam de morte
et pedes meos de lapsu,
ut ambulem coram Deo in lumine viventium.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc