Jó 13

¹ Ecce, omnia haec vidit oculus meus,
et audivit auris mea, et intellexi singula.

² Secundum scientiam vestram, et ego novi;
nec inferior vestri sum.

³ Sed tamen ad Omnipotentem loquar
et disputare cum Deo cupio;

⁴ vos autem ostendam fabricatores mendacii,
medicos vanos vos omnes.

⁵ Atque utinam taceretis,
ut sit vobis in sapientiam!

⁶ Audite ergo correptionem meam
et contentiones labiorum meorum attendite.

⁷ Numquid pro Deo profertis mendacium
et pro illo loquimini dolos?

⁸ Numquid faciem eius accipitis
et pro Deo in iudicio contendere nitimini?

⁹ Aut bonum est quod vos excutiat?
Aut, ut illuditur homini, illudetis ei?

¹⁰ Ipse vos arguet,
cum in abscondito faciem accipitis.

¹¹ Nonne maiestas eius turbabit vos,
et terror eius irruet super vos?

¹² Sententiae vestrae sunt proverbia cineris;
thoraces lutei thoraces vestri.

¹³ Tacete paulisper, ut loquar ipse,
et transeat super me quodcumque.

¹⁴ Quare sumam carnes meas dentibus meis
et animam meam ponam in manibus meis?

¹⁵ Etiamsi occiderit me, in ipso sperabo; verumtamen vias meas in conspectu eiusarguam.

¹⁶ Et hoc erit salus mea:
non enim veniet in conspectu eius omnis impius.

¹⁷ Audite sermonem meum
et explicationem meam percipite auribus vestris.

¹⁸ Ecce iudicium paravi;
scio quod iustus inveniar.

¹⁹ Quis est qui contendat mecum?
Tunc enim tacebo et consummabor.

²⁰ Duo tantum ne facias mihi,
et tunc a facie tua non abscondar:

²¹ Manum tuam longe fac a me,
et formido tua non me terreat.

²² Voca me, et ego respondebo tibi;
aut ipse loquar, et tu respondebis mihi.

²³ Quantas habeo iniquitates et peccata?
Scelera mea et delicta ostende mihi.

²⁴ Cur faciem tuam abscondis
et arbitraris me inimicum tuum?

²⁵ Contra folium, quod vento rapitur, dure agis
et stipulam siccam persequeris.

²⁶ Scribis enim contra me amaritudines
et occupatum me vis peccatis adulescentiae meae.

²⁷ Posuisti in nervo pedem meum
et observasti omnes semitas meas
et vestigia pedum meorum considerasti.

²⁸ Qui quasi uter consumendus sum,
et quasi vestimentum, quod comeditur a tinea.