Jó - 41

¹Ecce spes eius frustrabitur eum,
et aspectu eius praecipitabitur.
²Nemo tam audax, ut suscitet eum.
Quis enim resistere potest vultui eius?
³Quis eum aggressus est et salvus fuit?
Sub omni caelo quisnam?
⁴Non tacebo super membra eius
et eloquar robur et gratiam struis. ⁵Quis revelabit faciem indumenti eius,
et duplicia mandibulae eius quis intrabit?
⁶Portas vultus eius quis aperiet?
Per gyrum dentium eius formido.
⁷Corpus illius quasi scuta fusilia,
compactum sigillo siliceo:
⁸unum uni coniungitur,
et ne spiraculum quidem incedit per ea;
⁹unum alteri adhaeret,
et tenentes se nequaquam separantur.
¹⁰Sternutatio eius favillae ignis,
et oculi eius ut palpebrae diluculi.
¹¹De ore eius lampades procedunt,
sicut scintillae ignis emittuntur.
¹²De naribus eius procedit fumus,
sicut ollae succensae atque ferventis.
¹³Halitus eius prunas ardere facit,
et flamma de ore eius egreditur.
¹⁴In collo eius morabitur fortitudo,
et faciem eius praecedit angor.
¹⁵Palearia eius cohaerentia sibi
compressa non moventur.
¹⁶Cor eius induratur tamquam lapis
et duratur quasi mola inferior.
¹⁷Cum surrexerit, tremunt fortes
et ab undis retrorsum convertuntur.
¹⁸Qui impegerit in eum, gladius eius non stabit
nec hasta neque pilum neque thorax;
¹⁹reputat enim quasi paleas ferrum
et quasi lignum putridum aes.
²⁰Non fugat eum vir sagittarius,
in stipulam versi sunt ei lapides fundae.
²¹Quasi stipulam aestimat fustem
et deridet vibrantem acinacem.
²²Sub ipso acumina testae,
et sternit tribula super lutum.
²³Fervescere facit quasi ollam profundum
et mare ponit quasi vas unguentarium.
²⁴Post se illuminat semitam,
aestimatur abyssus quasi canescens.
²⁵Non est super terram potestas, quae comparetur ei,
qui factus est, ut nullum timeret.
²⁶Omne sublime videt:
ipse est rex super universos filios superbiae ”.