Giobbe 38

NOVA VULGATA	VULGATA
1 Respondens autem Dominus Iob de turbine dixit:	1 Respondens autem Dominus Job de turbine, dixit :
2 “ Quis est iste obscurans consilium sermonibus imperitis?	2 Quis est iste involvens sententias sermonibus imperitis ?
3 Accinge sicut vir lumbos tuos; interrogabo te, et edoce me.	3 Accinge sicut vir lumbos tuos : interrogabo te, et responde mihi.
4 Ubi eras, quando ponebam fundamenta terrae? Indica mihi, si habes intellegentiam.	4 Ubi eras quando ponebam fundamenta terræ ? indica mihi, si habes intelligentiam.
5 Quis posuit mensuras eius, si nosti? Vel quis tetendit super eam lineam?	5 Quis posuit mensuras ejus, si nosti ? vel quis tetendit super eam lineam ?
6 Super quo bases illius solidatae sunt? Aut quis demisit lapidem angularem eius,	6 Super quo bases illius solidatæ sunt ? aut quis demisit lapidem angularem ejus,
7 cum clamarent simul astra matutina, et iubilarent omnes filii Dei?	7 cum me laudarent simul astra matutina, et jubilarent omnes filii Dei ?
8 Quis conclusit ostiis mare, quando erumpebat quasi de visceribus procedens,	8 Quis conclusit ostiis mare, quando erumpebat quasi de vulva procedens ;
9 cum ponerem nubem vestimentum eius et caligine illud quasi fascia obvolverem?	9 cum ponerem nubem vestimentum ejus, et caligine illud quasi pannis infantiæ obvolverem ?
10 Definivi illud terminis meis et posui vectem et ostia	10 Circumdedi illud terminis meis, et posui vectem et ostia,
11 et dixi: Usque huc venies et non procedes amplius et hic confringes tumentes fluctus tuos.	11 et dixi : Usque huc venies, et non procedes amplius, et hic confringes tumentes fluctus tuos.
12 Numquid in diebus tuis praecepisti diluculo et assignasti aurorae locum suum,	12 Numquid post ortum tuum præcepisti diluculo, et ostendisti auroræ locum suum ?
13 et, cum extrema terrae teneres, excussi sunt impii ex ea?	13 Et tenuisti concutiens extrema terræ, et excussisti impios ex ea ?
14 Vertetur in lutum signatum et stabit sicut vestimentum.	14 Restituetur ut lutum signaculum, et stabit sicut vestimentum :
15 Cohibetur ab impiis lux sua, et brachium excelsum confringetur.	15 auferetur ab impiis lux sua, et brachium excelsum confringetur.
16 Numquid ingressus es scaturigines maris et in novissimis abyssi deambulasti?	16 Numquid ingressus es profunda maris, et in novissimis abyssi deambulasti ?
17 Numquid apertae sunt tibi portae mortis, et ostia tenebrosa vidisti?	17 Numquid apertæ sunt tibi portæ mortis, et ostia tenebrosa vidisti ?
18 Numquid considerasti latitudinem terrae? Indica mihi, si nosti omnia:	18 Numquid considerasti latitudinem terræ ? indica mihi, si nosti, omnia :
19 In qua via lux habitet, et tenebrarum quis locus sit;	19 in qua via lux habitet, et tenebrarum quis locus sit :
20 ut ducas unumquodque ad terminos suos et intellegas semitas domus eius?	20 ut ducas unumquodque ad terminos suos, et intelligas semitas domus ejus.
21 Novisti, nam tunc natus eras, et numerus dierum tuorum multus!	21 Sciebas tunc quod nasciturus esses, et numerum dierum tuorum noveras ?
22 Numquid ingressus es thesauros nivis aut thesauros grandinis aspexisti,	22 Numquid ingressus es thesauros nivis, aut thesauros grandinis aspexisti,
23 quae praeparavi in tempus angustiae, in diem pugnae et belli?	23 quæ præparavi in tempus hostis, in diem pugnæ et belli ?
24 Per quam viam spargitur lux, diffunditur ventus urens super terram?	24 Per quam viam spargitur lux, dividitur æstus super terram ?
25 Quis dedit vehementissimo imbri cursum et viam fulmini tonanti,	25 Quis dedit vehementissimo imbri cursum, et viam sonantis tonitrui,
26 ut plueret super terram absque homine, in deserto, ubi nullus mortalium commoratur,	26 ut plueret super terram absque homine in deserto, ubi nullus mortalium commoratur ;
27 ut impleret inviam et desolatam et produceret herbas in terra arida?	27 ut impleret inviam et desolatam, et produceret herbas virentes ?
28 Quis est pluviae pater, vel quis genuit stillas roris?	28 Quis est pluviæ pater ? vel quis genuit stillas roris ?
29 De cuius sinu egressa est glacies, et pruinam de caelo quis genuit?	29 De cujus utero egressa est glacies ? et gelu de cælo quis genuit ?
30 In similitudinem lapidis aquae durantur, et superficies abyssi constringitur.	30 In similitudinem lapidis aquæ durantur, et superficies abyssi constringitur.
31 Numquid coniungere valebis nexus stellarum Pleiadum aut funiculum Arcturi poteris solvere?	31 Numquid conjungere valebis micantes stellas Pleiadas, aut gyrum Arcturi poteris dissipare ?
32 Numquid produces Coronam in tempore suo et Ursam cum filiis ducis tu?	32 Numquid producis luciferum in tempore suo, et vesperum super filios terræ consurgere facis ?
33 Numquid nosti leges caeli et pones scripturam eius in terra?	33 Numquid nosti ordinem cæli, et pones rationem ejus in terra ?
34 Numquid elevabis in nebula vocem tuam, et impetus aquarum operiet te?	34 Numquid elevabis in nebula vocem tuam, et impetus aquarum operiet te ?
35 Numquid mittes fulgura, et ibunt et dicent tibi: “Adsumus!”?	35 Numquid mittes fulgura, et ibunt, et revertentia dicent tibi : Adsumus ?
36 Quis posuit in visceribus ibis sapientiam, vel quis dedit gallo intellegentiam?	36 Quis posuit in visceribus hominis sapientiam ? vel quis dedit gallo intelligentiam ?
37 Quis recensebit nubes in sapientia, et utres caeli quis declinabit,	37 Quis enarrabit cælorum rationem ? et concentum cæli quis dormire faciet ?
38 quando funditur pulvis in solidum, et glebae compinguntur?	38 Quando fundebatur pulvis in terra, et glebæ compingebantur ?
39 Numquid capies leaenae praedam et animam catulorum eius implebis,	39 Numquid capies leænæ prædam, et animam catulorum ejus implebis,
40 quando cubant in antris et in specubus insidiantur?	40 quando cubant in antris, et in specubus insidiantur ?
41 Quis praeparat corvo escam suam, quando pulli eius clamant ad Deum vagantes, eo quod non habeant cibos?	41 Quis præparat corvo escam suam, quando pulli ejus clamant ad Deum, vagantes, eo quod non habeant cibos ?