Scrutatio

Sabato, 27 aprile 2024 - Santa Zita ( Letture di oggi)

Giobbe 22

font
NOVA VULGATAVULGATA
1 Respondens autem Eliphaz Themanites dixit:
1 Respondens autem Eliphaz Themanites, dixit :
2 “ Numquid Deo prodesse potest homo,
cum vix intellegens sibi ipse proderit?
2 Numquid Deo potest comparari homo,
etiam cum perfectæ fuerit scientiæ ?
3 Quid prodest Omnipotenti, si iustus fueris,
aut quid ei confers, si immaculatam feceris viam tuam?
3 Quid prodest Deo, si justus fueris ?
aut quid ei confers, si immaculata fuerit via tua ?
4 Numquid pro tua pietate arguet te
et veniet tecum in iudicium?
4 Numquid timens arguet te,
et veniet tecum in judicium,
5 Et non propter malitiam tuam plurimam
et infinitas iniquitates tuas?
5 et non propter malitiam tuam plurimam,
et infinitas iniquitates tuas ?
6 Sumpsisti enim pignori fratres tuos sine causa
et nudos spoliasti vestibus.
6 Abstulisti enim pignus fratrum tuorum sine causa,
et nudos spoliasti vestibus.
7 Aquam lasso non dedisti
et esurienti cohibuisti panem.
7 Aquam lasso non dedisti,
et esurienti subtraxisti panem.
8 Numquid viro forti brachio erit terra,
et acceptus sedebit in ea?
8 In fortitudine brachii tui possidebas terram,
et potentissimus obtinebas eam.
9 Viduas dimisisti vacuas
et lacertos pupillorum comminuisti.		9 Viduas dimisisti vacuas,
et lacertos pupillorum comminuisti.
10 Propterea circumdatus es laqueis,
et conturbat te subita formido.
10 Propterea circumdatus es laqueis,
et conturbat te formido subita.
11 Vel tenebras non vides,
et impetus aquarum opprimit te.
11 Et putabas te tenebras non visurum,
et impetu aquarum inundantium non oppressum iri ?
12 “Nonne Deus excelsior caelo?
Et inspice stellarum verticem: quam sublimis!”.
12 an non cogitas quod Deus excelsior cælo sit,
et super stellarum verticem sublimetur ?
13 Et dicis: “Quid enim novit Deus
et quasi per caliginem iudicat?
13 Et dicis : Quid enim novit Deus ?
et quasi per caliginem judicat.
14 Nubes latibulum eius, nec nostra considerat;
et circa orbem caeli perambulat”.
14 Nubes latibulum ejus, nec nostra considerat,
et circa cardines cæli perambulat.
15 Numquid semitam saeculorum custodire cupis,
quam calcaverunt viri iniqui?
15 Numquid semitam sæculorum custodire cupis,
quam calcaverunt viri iniqui,
16 Qui sublati ante tempus suum,
et fluvius subvertit fundamentum eorum.
16 qui sublati sunt ante tempus suum,
et fluvius subvertit fundamentum eorum ?
17 Qui dicebant Deo: “Recede a nobis!”
et “Quid faciet Omnipotens nobis?”.
17 Qui dicebant Deo : Recede a nobis :
et quasi nihil posset facere Omnipotens, æstimabant eum,
18 Cum ille implesset domos eorum bonis,
quorum sententia procul erat ab eo.
18 cum ille implesset domos eorum bonis :
quorum sententia procul sit a me.
19 Videbunt iusti et laetabuntur,
et innocens subsannabit eos:
19 Videbunt justi, et lætabuntur,
et innocens subsannabit eos :
20 “Vere succisus est status eorum,
et reliquias eorum devoravit ignis”.		20 nonne succisa est erectio eorum ?
et reliquias eorum devoravit ignis ?
21 Acquiesce igitur ei, et habeto pacem;
et per haec habebis fructus optimos.
21 Acquiesce igitur ei, et habeto pacem,
et per hæc habebis fructus optimos.
22 Suscipe ex ore illius legem
et pone sermones eius in corde tuo.
22 Suscipe ex ore illius legem,
et pone sermones ejus in corde tuo.
23 Si reversus fueris ad Omnipotentem, aedificaberis
et longe facies iniquitatem a tabernaculo tuo.
23 Si reversus fueris ad Omnipotentem, ædificaberis,
et longe facies iniquitatem a tabernaculo tuo.
24 Comparabis tamquam terram aurum
et tamquam glaream torrentis Ophir.
24 Dabit pro terra silicem,
et pro silice torrentes aureos.
25 Eritque Omnipotens metallum tuum,
et argentum coacervabitur tibi.
25 Eritque Omnipotens contra hostes tuos,
et argentum coacervabitur tibi.
26 Tunc super Omnipotentem deliciis afflues
et elevabis ad Deum faciem tuam.		26 Tunc super Omnipotentem deliciis afflues,
et elevabis ad Deum faciem tuam.
27 Supplex rogabis eum, et exaudiet te,
et vota tua reddes.
27 Rogabis eum, et exaudiet te,
et vota tua reddes.
28 Decernes rem, et veniet tibi,
et in viis tuis splendebit lumen.
28 Decernes rem, et veniet tibi,
et in viis tuis splendebit lumen.
29 Quia humiliat eum, qui loquitur superba,
et demissus oculis ipse salvabitur.
29 Qui enim humiliatus fuerit, erit in gloria,
et qui inclinaverit oculos, ipse salvabitur.
30 Eripiet innocentem,
eripietur autem in munditia manuum suarum ”.
30 Salvabitur innocens :
salvabitur autem in munditia manuum suarum.