Giobbe 3
Confronta con un'altra Bibbia
Cambia Bibbia
NOVA VULGATA | VULGATA |
---|---|
1 Post haec aperuit Iob os suum et maledixit diei suo | 1 Post hæc aperuit Job os suum, et maledixit diei suo, |
2 et locutus est: | 2 et locutus est : |
3 “ Pereat dies, in qua natus sum, et nox, in qua dictum est: “Conceptus est homo”. | 3 Pereat dies in qua natus sum, et nox in qua dictum est : Conceptus est homo. |
4 Dies ille vertatur in tenebras; non requirat eum Deus desuper, et non illustretur lumine. | 4 Dies ille vertatur in tenebras : non requirat eum Deus desuper, et non illustretur lumine. |
5 Obscurent eum tenebrae et umbra mortis; occupet eum caligo, et involvatur amaritudine. | 5 Obscurent eum tenebræ et umbra mortis ; occupet eum caligo, et involvatur amaritudine. |
6 Noctem illam tenebrosus turbo possideat; non computetur in diebus anni nec numeretur in mensibus. | 6 Noctem illam tenebrosus turbo possideat ; non computetur in diebus anni, nec numeretur in mensibus. |
7 Sit nox illa solitaria nec laude digna; | 7 Sit nox illa solitaria, nec laude digna. |
8 maledicant ei, qui maledicunt diei, qui parati sunt suscitare Leviathan. | 8 Maledicant ei qui maledicunt diei, qui parati sunt suscitare Leviathan. |
9 Obtenebrentur stellae crepusculi eius; exspectet lucem, et non sit, nec videat palpebras aurorae, | 9 Obtenebrentur stellæ caligine ejus ; expectet lucem, et non videat, nec ortum surgentis auroræ. |
10 quia non conclusit ostia ventris, qui portavit me, nec abstulit mala ab oculis meis. | 10 Quia non conclusit ostia ventris qui portavit me, nec abstulit mala ab oculis meis. |
11 Quare non in vulva mortuus sum? Egressus ex utero non statim perii? | 11 Quare non in vulva mortuus sum ? egressus ex utero non statim perii ? |
12 Quare exceptus genibus? Cur lactatus uberibus? | 12 Quare exceptus genibus ? cur lactatus uberibus ? |
13 Nunc enim dormiens silerem et somno meo requiescerem | 13 Nunc enim dormiens silerem, et somno meo requiescerem |
14 cum regibus et consulibus terrae, qui aedificant sibi solitudines, | 14 cum regibus et consulibus terræ, qui ædificant sibi solitudines ; |
15 aut cum principibus, qui possident aurum et replent domos suas argento. | 15 aut cum principibus qui possident aurum, et replent domos suas argento ; |
16 Aut sicut abortivum absconditum non subsisterem, vel qui concepti non viderunt lucem. | 16 aut sicut abortivum absconditum non subsisterem, vel qui concepti non viderunt lucem. |
17 Ibi impii cessaverunt a tumultu, et ibi requieverunt fessi robore. | 17 Ibi impii cessaverunt a tumultu, et ibi requieverunt fessi robore. |
18 Et quondam vincti pariter sine molestia non audierunt vocem exactoris. | 18 Et quondam vincti pariter sine molestia, non audierunt vocem exactoris. |
19 Parvus et magnus ibi sunt, et servus liber a domino suo. | 19 Parvus et magnus ibi sunt, et servus liber a domino suo. |
20 Quare misero data est lux, et vita his, qui in amaritudine animae sunt? | 20 Quare misero data est lux, et vita his qui in amaritudine animæ sunt : |
21 Qui exspectant mortem, et non venit, et effodiunt quaerentes illam magis quam thesauros; | 21 qui expectant mortem, et non venit, quasi effodientes thesaurum ; |
22 gaudentque vehementer et laetantur sepulcro. | 22 gaudentque vehementer cum invenerint sepulchrum ? |
23 Viro, cuius abscondita est via, et circumdedit eum Deus tenebris. | 23 viro cujus abscondita est via et circumdedit eum Deus tenebris ? |
24 Antequam comedam, suspiro, et quasi inundantes aquae sic rugitus meus. | 24 Antequam comedam, suspiro ; et tamquam inundantes aquæ, sic rugitus meus : |
25 Quia timor, quem timebam, evenit mihi, et, quod verebar, accidit. | 25 quia timor quem timebam evenit mihi, et quod verebar accidit. |
26 Non dissimulavi, non silui, non quievi, et venit super me indignatio ”. | 26 Nonne dissimulavi ? nonne silui ? nonne quievi ? et venit super me indignatio. |