Giobbe 11
Confronta con un'altra Bibbia
Cambia Bibbia
NOVA VULGATA | VULGATA |
---|---|
1 Respondens autem Sophar Naamathites dixit: | 1 Respondens autem Sophar Naamathites, dixit : |
2 “ Numquid illi, qui multa loquitur, non et respondetur? Aut vir verbosus iustificabitur? | 2 Numquid qui multa loquitur, non et audiet ? aut vir verbosus justificabitur ? |
3 Vaniloquium tuum viros tacere faciet, et, cum ceteros irriseris, a nullo confutaberis? | 3 Tibi soli tacebunt homines ? et cum ceteros irriseris, a nullo confutaberis ? |
4 Dixisti enim: “Purus est sermo meus, et mundus sum in conspectu tuo”. | 4 Dixisti enim : Purus est sermo meus, et mundus sum in conspectu tuo. |
5 Atque utinam Deus ipse loqueretur tecum et aperiret labia sua tibi, | 5 Atque utinam Deus loqueretur tecum, et aperiret labia sua tibi, |
6 ut ostenderet tibi secreta sapientiae et arcana consilia eius, et intellegeres quod multo minora quaerat a te, quam meretur iniquitas tua. | 6 ut ostenderet tibi secreta sapientiæ, et quod multiplex esset lex ejus : et intelligeres quod multo minora exigaris ab eo quam meretur iniquitas tua ! |
7 Forsitan vestigia Dei comprehendes et usque ad perfectum Omnipotentem reperies? | 7 Forsitan vestigia Dei comprehendes, et usque ad perfectum Omnipotentem reperies ? |
8 Excelsior caelo est, et quid facies? Profundior inferno, et quid cognosces? | 8 Excelsior cælo est, et quid facies ? profundior inferno, et unde cognosces ? |
9 Longior terra mensura eius et latior mari. | 9 Longior terra mensura ejus, et latior mari. |
10 Si subverterit vel concluserit et coarctaverit, quis contradicet ei? | 10 Si subverterit omnia, vel in unum coarctaverit, quis contradicet ei ? |
11 Ipse enim novit hominum vanitatem; et videns iniquitatem nonne considerat? | 11 Ipse enim novit hominum vanitatem ; et videns iniquitatem, nonne considerat ? |
12 Sed et vir vacuus cordatus fit, et homo tamquam pullum onagri nascitur. | 12 Vir vanus in superbiam erigitur, et tamquam pullum onagri se liberum natum putat. |
13 Tu autem, si cor tuum firmaveris et expanderis ad eum manus tuas, | 13 Tu autem firmasti cor tuum, et expandisti ad eum manus tuas. |
14 si iniquitatem, quae est in manu tua,abstuleris a te, et non manserit in tabernaculo tuo iniustitia, | 14 Si iniquitatem quæ est in manu tua abstuleris a te, et non manserit in tabernaculo tuo injustitia, |
15 tunc levare poteris faciem tuam absque macula et eris stabilis et non timebis. | 15 tunc levare poteris faciem tuam absque macula ; et eris stabilis, et non timebis. |
16 Miseriae quoque oblivisceris et quasi aquarum, quae praeterierunt, recordaberis. | 16 Miseriæ quoque oblivisceris, et quasi aquarum quæ præterierunt recordaberis. |
17 Et quasi meridianus fulgor consurget tibi ad vesperam, et, cum te caligine tectum putaveris, orieris ut lucifer. | 17 Et quasi meridianus fulgor consurget tibi ad vesperam ; et cum te consumptum putaveris, orieris ut lucifer. |
18 Et habebis fiduciam, proposita tibi spe, et defossus securus dormies. | 18 Et habebis fiduciam, proposita tibi spe : et defossus securus dormies. |
19 Requiesces, et non erit qui te exterreat; et deprecabuntur faciem tuam plurimi. | 19 Requiesces, et non erit qui te exterreat ; et deprecabuntur faciem tuam plurimi. |
20 Oculi autem impiorum deficient, et effugium peribit ab eis; et spes illorum exhalatio animae ”. | 20 Oculi autem impiorum deficient, et effugium peribit ab eis : et spes illorum abominatio animæ. |