Psalmi 137

¹ Ipsi David. Confitebor tibi, Domine, in toto corde meo,
quoniam audisti verba oris mei.
In conspectu angelorum psallam tibi ;

² adorabo ad templum sanctum tuum,
et confitebor nomini tuo :
super misericordia tua et veritate tua ;
quoniam magnificasti super omne, nomen sanctum tuum.
³ In quacumque die invocavero te, exaudi me ;
multiplicabis in anima mea virtutem.
⁴ Confiteantur tibi, Domine, omnes reges terræ,
quia audierunt omnia verba oris tui.
⁵ Et cantent in viis Domini,
quoniam magna est gloria Domini ;
⁶ quoniam excelsus Dominus, et humilia respicit,
et alta a longe cognoscit.
⁷ Si ambulavero in medio tribulationis, vivificabis me ;
et super iram inimicorum meorum extendisti manum tuam,
et salvum me fecit dextera tua.
⁸ Dominus retribuet pro me.
Domine, misericordia tua in sæculum ;
opera manuum tuarum ne despicias.