Psalmi 117

¹ Alleluja. Confitemini Domino, quoniam bonus,
quoniam in sæculum misericordia ejus.

² Dicat nunc Israël : Quoniam bonus,
quoniam in sæculum misericordia ejus.
³ Dicat nunc domus Aaron :
Quoniam in sæculum misericordia ejus.
⁴ Dicant nunc qui timent Dominum :
Quoniam in sæculum misericordia ejus.
⁵ De tribulatione invocavi Dominum,
et exaudivit me in latitudine Dominus.
⁶ Dominus mihi adjutor ;
non timebo quid faciat mihi homo.
⁷ Dominus mihi adjutor,
et ego despiciam inimicos meos.
⁸ Bonum est confidere in Domino,
quam confidere in homine.
⁹ Bonum est sperare in Domino,
quam sperare in principibus.
¹⁰ Omnes gentes circuierunt me,
et in nomine Domini, quia ultus sum in eos.
¹¹ Circumdantes circumdederunt me,
et in nomine Domini, quia ultus sum in eos.
¹² Circumdederunt me sicut apes,
et exarserunt sicut ignis in spinis :
et in nomine Domini, quia ultus sum in eos.
¹³ Impulsus eversus sum, ut caderem,
et Dominus suscepit me.
¹⁴ Fortitudo mea et laus mea Dominus,
et factus est mihi in salutem.
¹⁵ Vox exsultationis et salutis
in tabernaculis justorum.
¹⁶ Dextera Domini fecit virtutem ;
dextera Domini exaltavit me :
dextera Domini fecit virtutem.
¹⁷ Non moriar, sed vivam,
et narrabo opera Domini.
¹⁸ Castigans castigavit me Dominus,
et morti non tradidit me.
¹⁹ Aperite mihi portas justitiæ :
ingressus in eas confitebor Domino.
²⁰ Hæc porta Domini :
justi intrabunt in eam.
²¹ Confitebor tibi quoniam exaudisti me,
et factus es mihi in salutem.
²² Lapidem quem reprobaverunt ædificantes,
hic factus est in caput anguli.
²³ A Domino factum est istud,
et est mirabile in oculis nostris.
²⁴ Hæc est dies quam fecit Dominus ;
exsultemus, et lætemur in ea.
²⁵ O Domine, salvum me fac ;
o Domine, bene prosperare.
²⁶ Benedictus qui venit in nomine Domini :
benediximus vobis de domo Domini.
²⁷ Deus Dominus, et illuxit nobis.
Constituite diem solemnem in condensis,
usque ad cornu altaris.
²⁸ Deus meus es tu, et confitebor tibi ;
Deus meus es tu, et exaltabo te.
Confitebor tibi quoniam exaudisti me,
et factus es mihi in salutem.
²⁹ Confitemini Domino, quoniam bonus,
quoniam in sæculum misericordia ejus.