Jó 20

¹ Respondens autem Sophar Naamathites dixit:

² “ Idcirco cogitationes meae reducunt me,
eo quod intellectus effulsit in me.

³ Doctrinam, qua me arguis, audiam,
at spiritus intellegentiae meae respondebit mihi.

⁴ Scisne hoc a principio,
ex quo positus est homo super terram,

⁵ quod exsultatio iniquorum brevis sit,
et gaudium impiorum ad instar puncti?

⁶ si ascenderit usque ad caelum superbia eius,
et caput eius nubes tetigerit,

⁷ quasi sterquilinium in finem perdetur,
et, qui eum viderant, dicent: “Ubi est?”.

⁸ Velut somnium avolans non invenietur,
transiet sicut visio nocturna.

⁹ Oculus, qui eum viderat, non videbit,
neque ultra intuebitur eum locus suus.

¹⁰ Filii eius satagent complacere pauperibus,
et manus illius reddent ei possessionem suam.

¹¹ Ossa eius, quae implebantur adulescentia,
cum eo in pulvere dormient.

¹² Cum enim dulce fuerit in ore eius malum,
abscondet illud sub lingua sua.

¹³ Parcet illi et non derelinquet illud
et celabit in gutture suo.

¹⁴ Panis eius in visceribus illius
vertetur in fel aspidum intrinsecus.

¹⁵ Divitias, quas devoravit, evomet,
et de ventre illius extrahet eas Deus.

¹⁶ Venenum aspidum sugebat,
et occidet eum lingua viperae.

¹⁷ Non videat rivulos olei,
torrentes mellis et butyri.

¹⁸ Restituet quaestum suum nec deglutiet,
de opibus venditionum non laetabitur.

¹⁹ Quoniam confringens deseruit pauperes,
domum rapuit et non aedificavit eam.

²⁰ Nec est satiatus venter eius;
et cum desideriis suis evadere non potuit.

²¹ Non fuerunt reliquiae de cibo eius,
et propterea nihil permanebit de bonis eius.

²² Cum satiatus fuerit, arctabitur;
et omnis dolor irruet super eum.

²³ Impleat ventrem suum:
emittet Deus in eum iram furoris sui
et pluet super illum bellum suum.

²⁴ Fugiet arma ferrea
et irruet in arcum aereum.

²⁵ Sagitta transverberabit corpus eius,
et fulgur iecur eius;
vadent et venient super eum horribilia.

²⁶ Omnes tenebrae absconditae sunt in occultis eius,
devorabit eum ignis, qui non succenditur;
affligetur relictus in tabernaculo suo.

²⁷ Revelabunt caeli iniquitatem eius,
et terra consurget adversus eum.

²⁸ Auferetur germen domus illius,
detrahetur in die furoris Dei.

²⁹ Haec est pars hominis impii a Deo,
et hereditas verborum eius a Domino ”.