Jó 31

¹ Pepigi foedus cum oculis meis
ut ne cogitarem quidem de virgine.

² Quae enim pars mea apud Deum desuper,
et quae hereditas apud Omnipotentem in excelsis?

³ Numquid non perditio est iniquo,
et alienatio operantibus iniustitiam?

⁴ Nonne ipse considerat vias meas
et cunctos gressus meos dinumerat?

⁵ Si ambulavi in vanitate,
et festinavit in dolo pes meus,

⁶ appendat me in statera iusta
et sciat Deus integritatem meam.

⁷ Si declinavit gressus meus de via,
et si secutum est oculos meos cor meum,
et si manibus meis adhaesit macula,

⁸ seram, et alius comedat,
et progenies mea eradicetur.

⁹ Si deceptum est cor meum super muliere,
et si ad ostium amici mei insidiatus sum,

¹⁰ molat pro alio uxor mea,
et super illam incurventur alii.

¹¹ Hoc enim nefas est
et iniquitas iudicialis;

¹² ignis est usque ad perditionem devorans
et omnia eradicans genimina.

¹³ Si contempsi subire iudicium cum servo meo et ancilla mea,
cum disceptarent adversum me,

¹⁴ quid enim faciam, cum surrexerit ad iudicandum Deus;
et, cum quaesierit, quid respondebo illi?

¹⁵ Numquid non in ventre fecit me,
qui et illum operatus est,
et formavit me in visceribus unus?

¹⁶ Si negavi, quod volebant, pauperibus
et oculos viduae languescere feci;

¹⁷ si comedi buccellam meam solus,
et non comedit pupillus ex ea,

¹⁸ quia ab infantia mea educavi eum ut pater
et de ventre matris meae direxi eam;

¹⁹ si despexi pereuntem, eo quod non habuerit indumentum,
et absque operimento pauperem;

²⁰ si non benedixerunt mihi latera eius,
et de velleribus ovium mearum calefactus est;

²¹ si levavi super pupillum manum meam,
cum viderem in porta adiutorium mihi,

²² umerus meus a iunctura sua cadat,
et brachium meum cum ossibus lacertorum confringatur,

²³ quia timor super me calamitas a Deo,
et contra maiestatem eius nihil valerem!

²⁴ Si putavi aurum securitatem meam
et obryzo dixi: Fiducia mea!;

²⁵ si laetatus sum super multis divitiis meis,
et quia plurima repperit manus mea;

²⁶ si vidi solem, cum fulgeret,
et lunam incedentem clare,

²⁷ et decepit me in abscondito cor meum,
et osculatus sum manum meam ore meo,

²⁸ quae est iniquitas iudicialis,
eo quod negassem Deum desuper;

²⁹ si gavisus sum ad ruinam eius, qui me oderat,
et exsultavi quod invenisset eum malum,

³⁰ cum non dederim ad peccandum guttur meum,
ut expeterem maledicens animam eius;

³¹ si non dixerunt viri tabernaculi mei: “Quis det, qui de carnibus eius nonsaturatus sit?”;

³² foris non mansit peregrinus,
ostium meum viatori patuit;

³³ si abscondi quasi homo peccatum meum
et celavi in sinu meo iniquitatem meam;

³⁴ si expavi ad multitudinem nimiam,
et despectio propinquorum terruit me,
et magis tacui nec egressus sum ostium.

³⁵ Quis mihi tribuat auditorem?
Ecce signum meum! Omnipotens respondeat mihi!
Ecce liber, quem scripsit vir litis meae,

³⁶ ut in umero meo portem illum
et alligem illum quasi coronam mihi.

³⁷ Numerum graduum meorum pronuntiabo illi
et quasi principem adibo eum.

³⁸ Si adversum me terra mea clamat,
et cum ipsa sulci eius deflent;

³⁹ si fructus eius comedi absque pecunia
et animam agricolarum eius afflixi,

⁴⁰ pro frumento oriatur mihi tribulus,
et pro hordeo herba foetida! ”.
Finita sunt verba Iob.