Siracide 13

¹ Qui tetigerit picem, inquinabitur ab ea;
et, qui communicaverit superbo, induet superbiam.

² Pondus super te ne tollas
et honestiori et ditiori te ne socius fueris.

³ Quid communicabit caccabus ad ollam?
Quando enim se colliserint, confringetur.

⁴ Dives iniuste egit et fremet,
pauper autem laesus, ipse supplicabit.

⁵ Si utilis fueris, assumet te
et, si non habueris, derelinquet te.

⁶ Si habes, convivet tecum et evacuabit te
et ipse non dolebit super te.

⁷ Si necessarius illi fueris, ludet te
et subridens spem dabit narrans tibi bona
et dicet: “ Quid opus est tibi? ”.

⁸ Et confundet te in cibis suis,
donec te exinaniat bis et ter
et in novissimo deridebit te;
et postea videns derelinquet te
et caput suum movebit ad te.

⁹ Humiliare Deo et exspecta manus eius.

¹⁰ Attende, ne seductus in stultitiam humilieris.

¹¹ Noli esse humilis in sapientia tua,
ne humiliatus in stultitiam seducaris.

¹² Advocatus a potentiore discede,
et eo magis te advocabit.

¹³ Ne accedas, ne impingaris;
et ne longe sis ab eo, ne eas in oblivionem.

¹⁴ Ne retineas ex aequo loqui cum illo
nec credas multis verbis illius;
ex multa enim loquela tentabit te
et subridens inquiret de absconditis tuis.

¹⁵ Immitis animus illius conservabit verba tua
et non parcet de malitia et de vinculis.

¹⁶ Cave tibi et attende diligenter auditui tuo,
quoniam cum subversione tua ambulas.

¹⁷ Audiens vero illa
ex somno evigila.

¹⁸ Omni vita tua dilige Deum
et invoca illum in salutem tuam.

¹⁹ Omne animal diligit simile sibi:
sic et omnis homo proximum sibi.

²⁰ Omnis caro ad similem sibi coniungetur,
et omnis homo simili sui sociabitur.

²¹ Quid communicabit lupus agno?
Sic peccator iusto.

²² Quae pax hyaenae ad canem?
Aut quae pars diviti ad pauperem?

²³ Venatio leonis onager in eremo,
sic et pascua divitum sunt pauperes.

²⁴ Et sicut abominatio est superbo humilitas,
sic et exsecratio divitis pauper.

²⁵ Dives commotus confirmatur ab amicis suis,
humilis autem, cum ceciderit, expelletur et a notis.

²⁶ Diviti decepto multi recuperatores:
locutus est nefaria, et iustificaverunt illum;

²⁷ humilis deceptus est, insuper et arguitur:
locutus est sensate, et non est datus ei locus.

²⁸ Dives locutus est, et omnes tacuerunt,
et verbum illius usque ad nubes perducent;

²⁹ pauper locutus est, et dicunt: “ Quis est hic? ”
et, si offenderit, insuper subvertent illum.

³⁰ Bona est substantia, cui non est peccatum in conscientia,
et nequissima paupertas in ore impii.

³¹ Cor hominis immutat faciem illius
sive in bona sive in mala.

³² Vestigium cordis boni facies hilaris:
difficile invenies et cum labore.