Ecclesiasticus 2

¹Fili, accedens ad servitutem Dei
sta in iustitia et timore
et praepara animam tuam ad tentationem.
²Dirige cor tuum et sustine,
inclina aurem tuam et suscipe verba intellectus
et ne sollicitus sis in tempore calamitatis.
³Sustine sustentationes Dei, coniungere Deo et ne laxes,
ut sapiens fias in viis tuis.
⁴Omne, quod tibi applicitum fuerit, accipe et in dolore sustine
et in humilitate tua patientiam habe,
⁵quoniam in igne probatur aurum et argentum,
homines vero receptibiles in camino humiliationis.
⁶Crede Deo, et recuperabit te,
et spera in illum, et diriget viam tuam;
serva timorem illius et in illo veterasce.
⁷Metuentes Dominum, sustinete misericordiam eius
et non deflectatis ab illo, ne cadatis.
⁸Qui timetis Dominum, credite illi,
et non evacuabitur merces vestra.
⁹Qui timetis Dominum, sperate in bona
et in oblectationem aevi et in misericordiam.
¹⁰Qui timetis Dominum, diligite illum, et illuminabuntur corda vestra.
¹¹Respicite, filii, generationes antiquas et videte:
quis speravit in Domino et confusus est?
¹²Aut quis permansit in mandatis eius et derelictus est?
Aut quis invocavit eum, et despexit illum?
¹³Quoniam pius et misericors est Dominus
et remittet in die tribulationis peccata
et protector est omnibus exquirentibus se in veritate.
¹⁴Vae duplici corde et labiis scelestis et manibus dissolutis
et peccatori terram ingredienti duabus viis!
¹⁵Vae dissolutis corde, qui non credunt,
et ideo non protegentur!
¹⁶Vae vobis, qui perdidistis sustinentiam
et qui dereliquistis vias rectas et divertistis in vias pravas!
¹⁷Et quid facietis, cum inspicere coeperit Dominus?
¹⁸Qui timent Dominum, non erunt incredibiles verbo illius;
et, qui diligunt illum, conservabunt viam illius.
¹⁹Qui timent Dominum, inquirent quae beneplacita sunt ei;
et, qui diligunt eum, replebuntur lege ipsius.
²⁰Qui timent Dominum, praeparabunt corda sua
et in conspectu illius sanctificabunt animas suas.
²¹Qui timent Dominum, custodiunt mandata illius
et patientiam habebunt usque ad inspectionem illius
²²dicentes: “ Si paenitentiam non egerimus,
incidemus in manus Domini et non in manus hominum;
²³secundum enim magnitudinem ipsius,
sic et misericordia illius ”.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati