Siracide 38

¹ Honora medicum propter necessitatem;
etenim illum creavit Altissimus.

² A Deo est enim illi sapientia,
et a rege accipiet donationem.

³ Disciplina medici exaltabit caput illius,
et in conspectu magnatorum collaudabitur.

⁴ Altissimus creavit de terra medicamenta,
et vir prudens non abhorrebit illa.

⁵ Nonne a ligno indulcata est aqua amara,

⁶ ut agnoscerent homines virtutem illius?
Et dedit hominibus scientiam Altissimus,
ut honoraretur in mirabilibus suis.

⁷ In his curans mitigabit dolorem,
et unguentarius faciet pigmenta suavitatis,
ut non consumantur opera eius:

⁸ et salus super faciem terrae.

⁹ Fili, in tua infirmitate ne despicias teipsum,
sed ora Dominum, et ipse curabit te.

¹⁰ Averte a delicto et dirige manus
et ab omni peccato munda cor tuum;

¹¹ da suavitatem et memoriam similaginis
et impingua oblationem pro opibus tuis.
Et da locum medico,

¹² etenim illum Dominus creavit;
et non discedat a te, quia opera eius sunt necessaria.

¹³ Est enim tempus, quando per manus illorum est solacium.

¹⁴ Ipsi vero Dominum deprecabuntur,
ut dirigat ad rectam cognitionem
et prosperet curationem.

¹⁵ Qui delinquit in conspectu eius, qui fecit eum,
incidet in manus medici.

¹⁶ Fili, in mortuum produc lacrimas
et, quasi dira passus, incipe lamentationem
et secundum iudicium contege corpus illius
et non despicias sepulturam illius.

¹⁷ Amare fer fletum et perfice lamentum

¹⁸ et fac luctum secundum meritum eius,
uno die vel duobus propter detractionem,
et consolare propter tristitiam.

¹⁹ A tristitia enim festinat mors,
et tristitia cordis flectit virtutem.

²⁰ In abductione permanet tristitia,
et vita inopis maledictio cordis.

²¹ Ne dederis in tristitia cor tuum,
sed repelle eam a te et memento novissimorum.

²² Ne ultra memineris: neque enim est conversio;
et huic nihil proderis et teipsum pessimabis.

²³ Memor esto iudicii eius, sic enim erit et tuum:
mihi heri, et tibi hodie.

²⁴ In requie mortui requiescere fac memoriam eius
et consolare in illo in exitu spiritus sui.

²⁵ Sapientia scribae in opportunitate vacationis;
et, qui minoratur operatione, ipse sapientia replebitur.
Qua sapientia replebitur,

²⁶ qui tenet aratrum
et qui gloriatur in iaculo stimuli?
Boves agitat et conversatur in operibus eorum,
et enarratio eius in filiis taurorum.

²⁷ Cor suum dabit ad versandos sulcos,
et vigilia eius in sagina vaccarum.

²⁸ Sic omnis faber et architectus,
qui noctem tamquam diem transigit,
qui sculpit signacula sculptilia,
et assiduitas eius variare picturam;
cor suum dabit in similitudinem picturae,
et vigilia sua perficere opus.

²⁹ Sic faber ferrarius sedens iuxta incudem
et considerans opus ferri;
vapor ignis uret carnes eius,
et in calore fornacis concertatur.

³⁰ Vox mallei exsurdat aurem eius,
et contra similitudinem vasis oculus eius.

³¹ Cor suum dabit in consummationem operum
et vigilia sua ornare in perfectionem.

³² Sic figulus sedens ad opus suum,
convertens pedibus suis rotam,
qui in sollicitudine positus est semper propter opus suum,
et in numero est omnis operatio eius;

³³ in brachio suo formabit lutum
et ante canos suos curvabit virtutem suam:

³⁴ cor suum dabit, ut consummet linitionem,
et vigilia sua mundare fornacem.

³⁵ Omnes hi in manibus suis speraverunt,
et unusquisque in arte sua sapiens est.

³⁶ Sine his omnibus non aedificabitur civitas,

³⁷ et non inhabitabunt nec inambulabunt.
Verumtamen in consilium populi non requirentur
et in ecclesiam non transilient;

³⁸ super sellam iudicis non sedebunt
et decretum iudicii non intellegent
neque palam facient disciplinam et iudicium
et in parabolis non invenientur;

³⁹ sed creaturam laboris confirmabunt,
et sollicitudo illorum in operatione artis.