Siracide 48

¹ Et surrexit Elias propheta quasi ignis,
et verbum ipsius quasi facula ardebat.

² Qui induxit in illos famem
et zelo suo paucos fecit eos.

³ Verbo Domini continuit caelum
et deiecit de caelo ignem ter.

⁴ Quam amplificatus es, Elias, in mirabilibus tuis!
Et quis potest similiter gloriari tibi?

⁵ Qui suscitasti mortuum de sorte mortis
ab inferis in verbo Domini.

⁶ Qui deiecisti reges ad perniciem
et gloriosos de lecto suo
et confregisti facile potentiam ipsorum;

⁷ qui audis in Sinai indicium
et in Horeb iudicia vindictae.

⁸ Qui ungis reges ad retributionem
et prophetas facis successores post te;

⁹ qui receptus es in turbine ignis
et in curru equorum igneorum;

¹⁰ qui scriptus es paratus in tempora
lenire iracundiam Domini ante furorem,
convertere cor patris ad filium
et restituere tribus Iacob.

¹¹ Beati sunt, qui te viderunt
et in amicitia tua dormierunt!

¹² Nam et nos vita quidem vivemus,
post mortem autem non erit tale nomen nostrum.

¹³ Elias quidem in turbine tectus est,
et in Eliseo completus est spiritus eius.
In diebus suis non pertimuit principem,
et potentia nemo vicit illum;

¹⁴ nec superavit illum verbum aliquod,
et mortuum prophetavit corpus eius.

¹⁵ In vita sua fecit monstra
et in morte mirabilia operatus est.

¹⁶ In omnibus istis non paenituit populum,
et non recesserunt a peccatis suis,
usque dum eiecti sunt de terra sua
et dispersi sunt in omnem terram;

¹⁷ et relicta est gens perpauca,
et princeps in domo David.

¹⁸ Quidam ipsorum fecerunt, quod placeret Deo;
alii autem multiplicaverunt peccata.

¹⁹ Ezechias munivit civitatem suam
et induxit in medium ipsius aquam et fodit ferro rupem
et aedificavit ad aquam puteum.

²⁰ In diebus ipsius ascendit Sennacherib
et misit Rabsacen et discessit,
et sustulit manum suam in Sion
et superbus factus est in exaltatione sua.

²¹ Tunc mota sunt corda et manus ipsorum,
et doluerunt quasi parturientes mulieres

²² et invocaverunt Dominum misericordem
et expandentes manus suas extulerunt ad eum,
et Sanctus audivit cito vocem ipsorum.

²³ Non est commemoratus peccatorum illorum
neque dedit illos inimicis suis,
sed purgavit eos in manu Isaiae sancti prophetae;

²⁴ percussit castra Assyriorum
et contrivit illos angelus eius.

²⁵ Nam fecit Ezechias quod placuit Deo
et fortiter ivit in via David patris sui,
quam mandavit illi Isaias propheta, magnus et fidelis in visione sua.

²⁶ In diebus ipsius retro rediit sol,
et addidit regi vitam.

²⁷ Spiritu magno vidit ultima
et consolatus est lugentes in Sion;
usque in sempiternum ostendit futura

²⁸ et abscondita, antequam evenirent.