Ecclesiasticus 44

¹Laus patrum.
Laudemus viros gloriosos
et parentes nostros in generatione sua.
²Multam gloriam fecit Dominus,
magnificentiam suam a saeculo.
³Dominantes in potestatibus suis,
homines magni virtute
et prudentia sua praediti,
nuntiantes in prophetiis,
⁴regentes populum in consiliis
et peritia scripturae populos;
verba sapientiae in disciplina eorum,
⁵requirentes modos musicos
et narrantes carmina scripturarum;
⁶homines divites innixi virtute,
pulchritudinis studium habentes,
pacificantes in domibus suis.
⁷Omnes isti in generationibus gentis suae gloriam adepti sunt
et a diebus suis habentur in laudibus.
⁸De illis nati sunt, qui reliquerunt nomen
narrandi laudes eorum.
⁹Et sunt quorum non est memoria:
perierunt quasi qui non fuerint;
et nati sunt quasi non nati,
et filii ipsorum post ipsos.
¹⁰Sed hi viri misericordiae sunt,
quorum pietates non fuerunt in oblivione.
¹¹Cum semine eorum permanent,
bona hereditas, nepotes eorum,
¹²et in testamentis stetit semen eorum;
¹³et filii eorum propter illos.
Usque in aeternum manet semen eorum,
et gloria eorum non derelinquetur.
¹⁴Corpora ipsorum in pace sepulta sunt,
et nomen eorum vivit in generationem et generationem;
¹⁵sapientiam ipsorum narrent populi,
et laudem eorum nuntiet ecclesia.
¹⁶Henoch placuit Deo et translatus est in paradisum,
ut det gentibus paenitentiam.
¹⁷Noe inventus est perfectus iustus
et in tempore iracundiae factus est reconciliatio;
¹⁸propter eum dimissum est reliquum terrae,
cum factum est diluvium:
¹⁹testamenta saeculi posita sunt apud illum,
ne deleri posset diluvio omnis caro.
²⁰Abraham magnus pater multitudinis gentium,
et non est inventa macula in gloria eius;
qui conservavit legem Excelsi
et fuit in testamento cum illo.
²¹In carne eius stare fecit testamentum,
et in tentatione inventus est fidelis.
²²Ideo iure iurando statuit illi
benedici gentes in semine eius,
crescere illum quasi terrae cumulum
²³et ut stellas exaltare semen eius
et hereditare illos a mari usque ad mare
et a Flumine usque ad terminos terrae.
²⁴Et in Isaac eodem modo statuit
propter Abraham patrem eius.
²⁵Benedictionem omnium gentium dedit illi Dominus
et testamentum confirmavit super caput Iacob.
²⁶Agnovit eum in benedictionibus suis
et dedit illi hereditatem
et divisit illi partem in tribubus duodecim.
²⁷Et eduxit ex illo hominem misericordiae
invenientem gratiam in oculis omnis carnis,

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati