Proverbia 5

¹Fili mi, attende ad sapientiam meam,
et prudentiae meae inclina aurem tuam,
²ut custodias cogitationes,
et disciplinam labia tua conservent.
³Favum enim stillant labia meretricis,
et nitidius oleo guttur eius;
⁴novissima autem illius amara quasi absinthium
et acuta quasi gladius biceps.
⁵Pedes eius descendunt in mortem,
et ad inferos gressus illius tendunt;
⁶cum non observet semitam vitae,
vagi sunt gressus eius, et ipsa nescit.
⁷Nunc ergo, fili mi, audi me
et ne recedas a verbis oris mei.
⁸Longe fac ab ea viam tuam
et ne appropinques foribus domus eius.
⁹Ne des alienis honorem tuum
et annos tuos crudeli,
¹⁰ne forte impleantur extranei viribus tuis,
et labores tui sint in domo aliena,
¹¹et gemas in novissimis,
quando consumpseris carnes tuas et corpus tuum
¹²et dicas: “ Cur detestatus sum disciplinam,
et increpationes renuit cor meum,
¹³nec audivi vocem docentium me
et magistris non inclinavi aurem meam?
¹⁴Paene fui in omni malo,
in medio ecclesiae et synagogae ”.
¹⁵Bibe aquam de cisterna tua
et fluenta putei tui,
¹⁶ne deriventur fontes tui foras,
et in plateis rivi aquarum;
¹⁷habeto eas solus,
nec sint alieni participes tui.
¹⁸Sit vena tua benedicta,
et laetare cum muliere adulescentiae tuae;
¹⁹cerva carissima et gratissimus hinnulus,
blanditiae eius inebrient te in omni tempore,
in amore eius delectare iugiter.
²⁰Quare seduceris, fili mi, ab aliena
et foveris in sinu extraneae?
²¹Quoniam ante Dominum viae hominis,
et omnes gressus eius considerat.
²²Iniquitates suae capient impium,
et funibus peccatorum suorum constringetur.
²³Ipse morietur, quia non habuit disciplinam,
et in multitudine stultitiae suae decipietur.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati