Proverbi 15

¹ Responsio mollis frangit iram,
sermo durus suscitat furorem.

² Lingua sapientium stillat scientiam,
os fatuorum ebullit stultitiam.

³ In omni loco oculi Domini
contemplantur malos et bonos.

⁴ Lingua placabilis lignum vitae,
sed obliquitas in ea conteret spiritum.

⁵ Stultus irridet disciplinam patris sui;
qui autem custodit increpationes, astutior fiet.

⁶ In domo iusti divitiae plurimae,
et in fructibus impii conturbatio.

⁷ Labia sapientium disseminabunt scientiam;
cor stultorum non rectum erit.

⁸ Victimae impiorum abominabiles Domino;
vota iustorum grata sunt ei.

⁹ Abominatio est Domino via impii;
qui sequitur iustitiam, diligetur.

¹⁰ Admonitio mala deserenti viam;
qui increpationes odit, morietur.

¹¹ Infernus et Perditio coram Domino,
quanto magis corda filiorum hominum!

¹² Non amat derisor eum, qui se corripit,
nec ad sapientes graditur.

¹³ Cor gaudens exhilarat faciem,
in maerore animi deicitur spiritus.

¹⁴ Cor sapientis quaerit doctrinam,
et os stultorum pascitur stultitia.

¹⁵ Omnes dies pauperis mali;
hilaris autem corde quasi iuge convivium.

¹⁶ Melius est parum cum timore Domini
quam thesauri magni cum sollicitudine.

¹⁷ Melius est demensum holerum cum caritate
quam vitulus saginatus cum odio.

¹⁸ Vir iracundus provocat rixas;
qui patiens est, mitigat lites.

¹⁹ Iter pigrorum quasi saepes spinarum,
via sollertium complanata.

²⁰ Filius sapiens laetificat patrem,
et stultus homo despicit matrem suam.

²¹ Stultitia gaudium sensu carenti;
et vir prudens dirigit gressus suos.

²² Dissipantur cogitationes, ubi non est consilium;
ubi vero sunt plures consiliarii, confirmantur.

²³ Laetatur homo in responsione oris sui,
et sermo opportunus est optimus.

²⁴ Semita vitae sursum est viro erudito,
ut declinet de inferno deorsum.

²⁵ Domum superborum demolietur Dominus
et firmos faciet terminos viduae.

²⁶ Abominatio Domini cogitationes malae,
et purus sermo pulcherrimus.

²⁷ Conturbat domum suam, qui sectatur avaritiam;
qui autem odit munera, vivet.

²⁸ Mens iusti meditatur, ut respondeat;
os impiorum redundat malis.

²⁹ Longe est Dominus ab impiis
et orationes iustorum exaudiet.

³⁰ Lux oculorum laetificat animam,
fama bona impinguat ossa.

³¹ Auris, quae audit increpationes vitae,
in medio sapientium commorabitur.

³² Qui abicit disciplinam, despicit animam suam;
qui autem acquiescit increpationibus, possessor est cordis.

³³ Timor Domini disciplina sapientiae,
et gloriam praecedit humilitas.